മാനന്തവാടി: ആറുകിലോ കഞ്ചാവുമായി യുവാവ് പിടിയിലായി. എക്‌സൈസ് സംഘം നടത്തിയ വാഹന പരിശോധനക്കിടെയാണ് തൃശൂര്‍ ചെന്ത്രാപ്പിന്നി അന്നിക്കല്‍ വീട്ടില്‍ സനു വില്‍സന്‍(27) പിടിയിലായത്. ബംഗളൂരുവില്‍ നിന്ന് കോഴിക്കോടേക്ക് പോകുകയായിരുന്ന ബസില്‍ വെള്ളിയാഴ്ച പുലര്‍ച്ചെ നടത്തിയ പരിശോധനയിലാണ് കഞ്ചാവ് പിടികൂടിയത്. ഉണക്കിയെടുത്ത കഞ്ചാവ് കാര്‍ഡ് ബോര്‍ഡ് പെട്ടികളിലാക്കി ബാഗില്‍ സൂക്ഷിച്ച നിലയിലായിരുന്നു. തൃശൂര്‍ ആസ്ഥാനമായി കഞ്ചാവ് വില്‍പ്പന നടത്തുന്ന സംഘത്തിലെ മുഖ്യ കണ്ണിയാണ് പ്രതിയെന്ന് സംശയിക്കുന്നതായി എക്‌സൈസ് അധികൃതര്‍ പറഞ്ഞു.