നെടുമ്പാശ്ശേരി: അന്താരാഷ്ട്ര വിമാനത്താവളം വഴി അനധികൃതമായി സ്വര്‍ണം കടത്താന്‍ ശ്രമിച്ച രണ്ട് സുഡാന്‍ സ്വദേശിനികള്‍ കസ്റ്റംസിന്റെ പിടിയിലായി. ഇന്നലെ വൈകിട്ട് അഞ്ചിന് സഊദി എയര്‍ലൈന്‍സ് വിമാനത്തില്‍ ജിദ്ദയില്‍നിന്നാണ് ഇവര്‍ നെടുമ്പാശ്ശേരിയിലെത്തിയത്.
ധരിച്ചിരുന്ന വസ്ത്രത്തിനുള്ളില്‍ ആഭരണങ്ങളായി ഒളിപ്പിച്ച് 19 ലക്ഷം രൂപ വില വരുന്ന സ്വര്‍ണമാണ് ഇവര്‍ കടത്താന്‍ ശ്രമിച്ചത്. ഒരാളില്‍നിന്ന് 288 ഗ്രാമും, മറ്റേയാളില്‍ നിന്നു 340 ഗ്രാം സ്വര്‍ണാഭരണങ്ങളുമാണ് പിടികൂടിയത്.
കഴിഞ്ഞ പത്ത് ദിവസത്തിനിടെ നാല് സുഡാന്‍ വനിതകളാണ് സ്വര്‍ണം കടത്താന്‍ ശ്രമിക്കുന്നതിനിടെ നെടുമ്പാശ്ശേരിയില്‍ പിടിയിലായത്.
ഈ മാസം പത്തിന് സഊദി എയര്‍ലൈന്‍സ് വിമാനത്തില്‍ സിംഗപ്പൂരില്‍നിന്നു വന്ന സുഡാന്‍ സ്വദേശിനി നസ്രിദിനില്‍നിന്ന് അനധികൃതമായി കടത്താന്‍ ശ്രമിച്ച 470 ഗ്രാം സ്വര്‍ണം പിടികൂടിയിരുന്നു.
സ്വര്‍ണം കടത്താന്‍ ശ്രമിക്കുന്നതിനിടെ നെടുമ്പാശ്ശേരി വിമാനത്താവളത്തില്‍ പിടിയിലാകുന്ന ആദ്യ സുഡാന്‍ സ്വദേശിയായിരുന്നു നസ്രിദിന്‍.
തുടര്‍ന്ന് പത്ത് ദിവസത്തിനിടെ മൂന്ന് സുഡാന്‍ വനിതകള്‍ കൂടി അനധികൃതമായി സ്വര്‍ണം കടത്താന്‍ ശ്രമിച്ചത് കസ്റ്റംസ് വിഭാഗത്തെ അമ്പരപ്പിച്ചിട്ടുണ്ട്. ഏഴര ലക്ഷം രൂപയോളം വില വരുന്ന 250 ഗ്രാം സ്വര്‍ണാഭരണങ്ങളുമായി വ്യാഴാഴ്ചയാണ് മറ്റൊരു സുഡാന്‍ സ്വദേശിനി പിടിയിലായിരുന്നത്.