കൊച്ചി: നടിയെ ആക്രമിച്ച കേസില്‍ ജാമ്യത്തിലിറങ്ങിയ നടന്‍ ദിലീപിന് സ്വകാര്യ സുരക്ഷ. ഇന്നലെയാണ് നടന്‍ ദിലീപ് സ്വന്തം നിലക്ക് സ്വകാര്യ ഏജന്‍സിയെ തന്റെ സുരക്ഷയ്ക്കായി നിയമിച്ചത്.

തണ്ടര്‍ഫോഴ്‌സ് എന്ന സ്വകാര്യ ഏജന്‍സിയാണ് സുരക്ഷ ഒരുക്കുന്നത്. ഗോവ ആസ്ഥാനമായുള്ള സ്വകാര്യ ഏജന്‍സിയാണ് തണ്ടര്‍ഫോഴ്‌സ്. മൂന്നു സുരക്ഷ ഉദ്യോഗസ്ഥരാണ് ദിലീപിന്റെ കൂടെയുണ്ടാവുക. സംഘം ഇന്നലെ ദിലീപിന്റെ വീട്ടിലെത്തി ചര്‍ച്ച നടത്തി.

വിരമിച്ച മലയാളി പൊലിസ് ഉദ്യോഗസ്ഥന്റെ നേതൃത്വത്തിലുള്ള ടീമാണ് സുരക്ഷയൊരുക്കുന്നത്. ദിലീപ് സുരക്ഷ തേടിയ സാഹചര്യം പരിശോധിക്കുമെന്ന് അന്വേഷണ സംഘം അറിയിച്ചു. ആയുധങ്ങള്‍ അടക്കമാണോ സുരക്ഷയെന്നും ആരില്‍ നിന്നെങ്കിലും ദിലീപിന് വധഭീഷണിയുണ്ടോയെന്നും പൊലിസ് പരിശോധിക്കുന്നുണ്ട്.