പാല: സംസ്ഥാന സ്‌കൂള്‍ കായിക മേളയിലെ വേഗതയേറിയ താരങ്ങളെ കണ്ടെത്തുന്ന 100 മീറ്റര്‍ മത്സരങ്ങള്‍ പൂര്‍ത്തിയായി.സീനിയര്‍ വിഭാഗം ആണ്‍കുട്ടികളില്‍ തിരുവനന്തപുരം സായിയിലെ ആന്‍സ്റ്റിന്‍ ജോസഫ് സ്വര്‍ണം നേടി.

സീനിയര്‍ വിഭാഗം പെണ്‍കുട്ടികളില്‍ പുല്ലൂരാംപാറ സെന്റ് ജോസഫ് എച്ച്.എസ്.എസിലെ അപര്‍ണ റോയ് സ്വര്‍ണം നേടി. 12.49 സെക്കന്റില്‍ ആണ് അപര്‍ണ റോയ് ഫിനിഷ് ചെയ്തത്.

സബ്ജൂനിയര്‍ വിഭാഗം പെണ്‍കുട്ടികളില്‍ നേഹ സ്വര്‍ണം നേടിയപ്പോള്‍ സെന്റ് ജോര്‍ജ് കോതമംഗലത്തിന്റെ താങ്ചം അലേറ്റ്‌സന്‍ ആണ്‍കുട്ടികളില്‍ സ്വര്‍ണം നേടി. മണിപ്പൂര്‍ സ്വദേശിയാണ് താങ്ചം.

ജൂനിയര്‍ വിഭാഗം പെണ്‍കുട്ടികളില്‍ തൃശൂര്‍ നാട്ടിക എച്ച്.എസ്.എസിലെ ആന്‍സി സോജന്‍ സ്വര്‍ണം നേടിയപ്പോള്‍ ആണ്‍കുട്ടികളില്‍ തിരുവനന്തപുരം സായിയിലെ സി. അഭിനവ് സ്വര്‍ണം നേടി. തുടര്‍ച്ചയായി രണ്ടാം വര്‍ഷമാണ് അഭിനവ് സ്വര്‍ണം നേടുന്നത്.

100 മീറ്ററില്‍ അത്യന്തം വീറും വാശിയും നിറഞ്ഞ ആവേശകരമായ മത്സരമായിരുന്നു കാണാന്‍ കഴിഞ്ഞത്. ട്രാക്കിലെ വേഗമേറിയ താരത്തെ അറിയാനുള്ള മത്സരം കാണാന്‍ നിരവധി പേരാണ് പാലാ മുനിസിപ്പല്‍ സ്റ്റേഡിയത്തിലെത്തിയത്.