ജംഷഡ്പൂര്‍: റേഷന്‍ സാധനങ്ങള്‍ ലഭിക്കാന്‍ ആധാര്‍കാര്‍ഡ് നിര്‍ബന്ധമല്ലെന്ന് ജാര്‍ഖണ്ഡ് സര്‍ക്കാര്‍. ആധാറുമായി റേഷന്‍ കാര്‍ഡ് ബന്ധിപ്പിച്ചില്ലെന്ന കാരണത്താല്‍ റേഷന്‍ സാധനങ്ങള്‍ കിട്ടാതെ പട്ടിണി കിടന്ന് 11 കാരി മരിക്കാനിടയായ സാഹചര്യത്തിലാണ് സര്‍ക്കാര്‍ പുതിയ മാര്‍ഗനിര്‍ദേശം പുറപ്പെടുവിച്ചത്.
കഴിഞ്ഞ സെപ്റ്റംബര്‍ 28നാണ് പട്ടിണിമൂലം പെണ്‍കുട്ടി മരിച്ചത്. ആധാര്‍ കാര്‍ഡുമായി റേഷന്‍ കാര്‍ഡ് ബന്ധിപ്പിക്കാത്തതുകാരണം റേഷന്‍ സാധനങ്ങള്‍ നിഷേധിച്ചതായി ആരോപണവും ഉയര്‍ന്നിരുന്നു.
ആധാര്‍കാര്‍ഡുമായി ബന്ധിപ്പിക്കണമെന്നത് നിര്‍ബന്ധമല്ലെന്നും റേഷന്‍ കാര്‍ഡില്ലെങ്കില്‍ പകരം ഡ്രൈവിങ് ലൈസന്‍സ്, തെരഞ്ഞെടുപ്പ് തിരിച്ചറിയല്‍ കാര്‍ഡ് ഉള്‍പ്പെടെയുള്ള ഏതെങ്കിലും കാര്‍ഡ് ഉള്ളവര്‍ക്കും റേഷന്‍ സാധനങ്ങള്‍ നല്‍കാന്‍ സര്‍ക്കാര്‍ ഉത്തരവിട്ടിട്ടുണ്ട്. റേഷന്‍ സാധനങ്ങള്‍ ലഭിക്കാത്ത തുമായി ബന്ധപ്പെട്ട് ഏത് തരത്തിലുള്ള പരാതികളുണ്ടെങ്കിലും ബന്ധപ്പെട്ടവരെ അറിയിക്കാനുള്ള സംവിധാനം ഏര്‍പ്പെടുത്തിയതായും സംസ്ഥാന ഭക്ഷ്യമന്ത്രി സരയു റോയ് അറിയിച്ചു.
അതേസമയം പെണ്‍കുട്ടി മരിച്ചത് പട്ടിണി കാരണമല്ലെന്നും മലേറിയ രോഗം പിടിപെട്ടാണെന്നും മുഖ്യമന്ത്രി രഘുബര്‍ ദാസ് അറിയിച്ചു. ആരോഗ്യവകുപ്പിന്റെ അന്വേഷണത്തിന്റെ അടിസ്ഥാനത്തിലാണ് മുഖ്യമന്ത്രി ഇക്കാര്യം അറിയിച്ചതെന്നാണ് ഔദ്യോഗിക വിശദീകരണം.