കൊല്‍ക്കത്ത: ഇന്ന് നടക്കുന്ന അവസാന ക്വാര്‍ട്ടറില്‍ ക്ലാസ്സിക്ക് പോരാട്ടം പ്രതീക്ഷിക്കാം. മുന്‍ ചാംപ്യന്‍മാരായ ബ്രസീല്‍ യൂറോപ്യന്‍ കരുത്തരായ ജര്‍മനിയുമായി ഏറ്റുമുട്ടും. ബ്രസീലാണ് ടൂര്‍ണമെന്റിലെ ഏറ്റവും മികച്ച മുന്നേറ്റം നടത്തുന്ന ടീമുകളിലൊന്ന്. ഗ്രൂപ്പ് ഘട്ടത്തിലെ മൂന്ന് മത്സരങ്ങളും പ്രീ ക്വാര്‍ട്ടറിലെ ഒരു പോരാട്ടവും അടക്കം നാല് മത്സരങ്ങളില്‍ ഒരു ഗോള്‍ മാത്രമാണ് അവര്‍ വഴങ്ങിയത്. അതും സെല്‍ഫ് ഗോള്‍.
കൊച്ചിയില്‍ അരങ്ങേറിയ സ്‌പെയിനിനെതിരായ ആദ്യ മത്സരത്തില്‍ ബ്രസീല്‍ താരം വെസ്‌ലി തന്നെയാണ് സ്വന്തം ബോക്‌സില്‍ പന്തെത്തിച്ചത്. എതിരാളികളായി കളിച്ച നാല് ടീമിലെ ഒരു താരത്തിനും ബ്രസീല്‍ പോസ്റ്റില്‍ പന്തെത്തിക്കാന്‍ സാധിച്ചിട്ടില്ല. 355 മിനുട്ടാണ് അവര്‍ ഗോള്‍ വഴങ്ങാതെ മുന്നേറുന്നത്.
മറുഭാഗത്ത് ടൂര്‍ണമെന്റില്‍ ആധികാരിക മുന്നേറ്റം നടത്തുന്ന ബ്രസീലിനെ ജര്‍മന്‍ കൗമാരം കീഴടക്കുമോയെന്നാണ് മത്സരത്തില്‍ കൗതുകമായി നില്‍ക്കുന്നത്.
ഗ്രൂപ്പ് ഘട്ടത്തില്‍ ഇറാനോട് മറുപടിയില്ലാത്ത നാല് ഗോളിന്റെ തോല്‍വി വഴങ്ങിയ ജര്‍മനി പക്ഷേ പ്രീ ക്വാര്‍ട്ടറില്‍ കൊളംബിയയെ 4-0ത്തിന് കീഴടക്കി സ്വതസിദ്ധമായ ശൈലയിലേക്ക് മടങ്ങിയെത്തിയാണ് ക്വാര്‍ട്ടറിനിറങ്ങുന്നത്.