റിയാദ്: സഊദിയില്‍ താമസ രേഖയുള്ള വിദേശികളുടെ നവജാത ശിശുക്കള്‍ക്ക് രാജ്യത്തേക്ക് കടക്കാന്‍ ഓണ്‍ അറൈവല്‍ വിസ ലഭ്യമാകുമെന്ന് സഊദി പാസ്‌പോര്‍ട്ട് അതോറിറ്റി വ്യക്തമാക്കി. വിദേശ രാജ്യങ്ങളില്‍ പ്രസവം നടക്കുമ്പോള്‍ കുട്ടിക്ക് വേണ്ടി പ്രത്യേകം വിസ വിദേശ രാജ്യങ്ങളിലെ കോണ്‍സുലേറ്റില്‍ നിന്നോ എംബസിയില്‍ നിന്നോ പാസ്‌പോര്‍ട്ടില്‍ പതിക്കുന്നത് ആവശ്യമില്ല.

മാതാപിതാക്കള്‍ക്ക് സഊദി താമസ രേഖയുണ്ടെങ്കില്‍ ഇവര്‍ പുതിയ കുട്ടിക്ക് പാസ്‌പോര്‍ട്ട് തരപ്പെടുത്തി നേരിട്ട് രാജ്യത്തെ ഏതെങ്കിലും വിമാനത്താവളത്തില്‍ ഇറങ്ങിയാല്‍ മതിയാകും. ഇവിടെ നിന്നും രാജ്യത്തേക്ക് പ്രവേശിക്കാനുള്ള ഓണ്‍ അറൈവല്‍ വിസ നല്‍കാന്‍ കഴിയുമെന്ന് പാസ്‌പോര്‍ട്ട് വിഭാഗം അറിയിച്ചതായി സഊദി പാസ്‌പോര്‍ട്ട് വിഭാഗത്തെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.