ന്യൂയോര്‍ക്ക്: പൗരന്മാര്‍ക്കെതിരേ രാസായുധ പ്രയോഗം നടത്തിയതിന് സിറിയക്കെതിരേ അന്വേഷണം നടത്തുന്ന കമ്മിറ്റിയെ പുതിക്കുന്നതിനെ രക്ഷാസമിതിയില്‍ റഷ്യ വീറ്റോ ചെയ്തു. രക്ഷാസമിതി 2015ല്‍ രൂപീകരിച്ച രാസായുധ നിരോധനത്തിലൂടെ സംഘടനയെ പുതുക്കുന്നതിനെയാണ് റഷ്യ എതിര്‍ത്തത്.
ജോയിന്റ് ഇന്‍വെസ്റ്റിഗേഷന്‍ മെക്കാനിസം(ജി.ഐ.എം)എന്ന പേരില്‍ അറിയപ്പെടുന്ന ഈ സംഘടന 2015ല്‍ ആണ് രൂപീകരിച്ചത്. 15 അംഗങ്ങളാണ് സംഘടനയിലുണ്ടായിരുന്നത്. കഴിഞ്ഞ വര്‍ഷവും പുതുക്കിയ സംഘടനയുടെ കാലാവധി അടുത്ത മാസം മധ്യത്തില്‍ അവസാനിക്കുന്നതിനെ തുടര്‍ന്നാണ് കമ്മിറ്റി പുതുക്കല്‍ ചര്‍ച്ച രക്ഷാസമിതിയില്‍ നടന്നത്. ഈ ഏപ്രില്‍ നാലിന് ഖാന്‍ ശൈഖൂനില്‍ നടന്ന രാസായുധ പ്രയോഗത്തില്‍ സിറിയന്‍ സര്‍ക്കാര്‍ കുറ്റക്കാരാണെന്ന് ജി.ഐ.എം കണ്ടെത്തിയിരുന്നു.
എന്നാല്‍ റഷ്യയുടെ നടപടിക്കെതിരേ യു.എസ് ശക്തമായി രംഗത്തുവന്നു. സിറിയയിലെ അസദിന്റെ സര്‍ക്കാര്‍ എന്ത് ക്രൂരമായ അക്രമണം നടത്തിയാലും പിന്തുണക്കുമെന്നത് റഷ്യ വീണ്ടും തെളിയിച്ചിരിക്കുകയാണെന്ന് യു.എന്നിലെ യു.എസ് അംബാസഡര്‍ നിക്കി ഹാലെ കുറ്റപ്പെടുത്തി.