കോഴിക്കോട്: അന്തരിച്ച മലങ്കര ഓര്‍ത്തഡോക്‌സ് സുറിയാനി സഭ മലബാര്‍ ഭദ്രാസനാധിപന്‍ ഡോ. സഖറിയ മാര്‍ തെയോഫിലോസിന്റെ (65) കബറടക്കം ഇന്ന് കോയമ്പത്തൂരില്‍ നടക്കും.
ഇന്നലെ ഉച്ചയ്ക്ക് ഒരു മണിയോടെ പൊതുദര്‍ശനത്തിനു ശേഷം ഭൗതിക ശരീരം കോയമ്പത്തൂര്‍ തടാകം ക്രിസ്തുശിഷ്യ ആശ്രമത്തിലേക്കു വിലാപയാത്രയായി കൊണ്ടുപോയി. അദ്ദേഹം നേരത്തേ ആഗ്രഹം പ്രകടിപ്പിച്ചതനുസരിച്ചാണ് കബറടക്കം കോയമ്പത്തൂരില്‍ നടത്തുന്നത്. രാവിലെ 10 ന് പരിശുദ്ധ കാതോലിക്കാ ബസേലിയോസ് മാര്‍തോമ പൗലോസ് ദ്വിതീയന്‍ ബാവയുടെ മുഖ്യകാര്‍മികത്വത്തിലാണ് ചടങ്ങുകള്‍ നടക്കുക.
പൗലോസ് ദ്വിതീയന്‍ ബാവ, കൊച്ചി മെത്രാപൊലീത്ത യാക്കോബ് മാര്‍ ഐറേനിയോസ്, മലബാര്‍ ഭദ്രാസനാധിപ സഹായ മെത്രാന്‍ മാത്യൂസ് മാര്‍ തേവോദോസിയോസ്, സെക്രട്ടറി ഫാ.തോമസ് കുര്യന്‍ താഴെയില്‍, താമരശ്ശേരി മുന്‍ ബിഷപ് മാര്‍ പോള്‍ ചിറ്റിലപ്പള്ളി, എം.ഐ ഷാനവാസ് എം.പി, ഡെപ്യൂട്ടി മേയര്‍ മീര ദര്‍ശക്, ഡി.സി.സി പ്രസിഡന്റ് ടി.സിദ്ദീഖ് തുടങ്ങിയവര്‍ അന്ത്യോപചാരമര്‍പ്പിക്കാനെത്തി.