പൊന്നാനി: പൊന്നാനി ഫിഷറീസ് ക്ഷേമനിധി ഓഫിസില്‍ ക്ഷേമനിധി അടക്കാനാകാതെ മത്സ്യത്തൊഴിലാളികള്‍ വലയുന്നു.
പൊന്നാനി താലൂക്ക് ഓഫീസിനു സമീപം പ്രവര്‍ത്തിക്കുന്ന ക്ഷേമനിധി ഓഫീസിലെത്തുന്നവരാണ് മണിക്കൂറുകളോളം ക്യൂ നിന്ന് വലയുന്നത്. നേരത്തെ ആഴ്ചയില്‍ നാലു ദിവസം പണമടക്കാന്‍ സൗകര്യമുണ്ടായിരുന്നത് രണ്ട് ദിവസമായി വെട്ടിക്കുറച്ചതോടെയാണ് മത്സ്യത്തൊഴിലാളികള്‍ പ്രയാസത്തിലായത്. ഇപ്പോള്‍ ആഴ്ചയില്‍ ചൊവ്വാഴ്ചയും വ്യാഴാഴ്ചയും മാത്രമാണ് ക്ഷേമനിധി അടക്കാന്‍ സൗകര്യമുള്ളത്.
ഈ വര്‍ഷത്തെ ക്ഷേമനിധി അടക്കുന്നതിനുള്ള സൗകര്യം നാളെ വരെ മാത്രമായിരുന്നു. സര്‍ക്കാരിന്റെ തീരുമാനം വന്നതോടെ നൂറുകണക്കിനാളുകളാണ് ആഴ്ചകളായി ഓഫീസിനു മുന്നില്‍ കൂ നിന്ന് വലയുന്നത്. ഈ ഉത്തരവിനെത്തുടര്‍ന്ന് പ്രതിഷേധവും ശക്തമായി. രാവിലെ മുതല്‍ സ്ത്രീകളടക്കം നൂറുകണക്കിനാളുകളാണ് ക്ഷേമനിധി അടക്കാന്‍ ഓഫീസിനു മുന്നില്‍ കാത്തുകെട്ടി നിന്നത്. നേരത്തെ പാലപ്പെട്ടിയിലെ ഫിഷറീസ് ഓഫീസില്‍ ക്ഷേമനിധി അടക്കാന്‍ സൗകര്യമുണ്ടായിരുന്നു. എന്നാല്‍ ഇത് നിര്‍ത്തലാക്കിയതോടെ പൊന്നാനി താലൂക്കിലെ ഏഴ് മത്സ്യഗ്രാമങ്ങളിലുള്ളവരും പൊന്നാനി ക്ഷേമനിധി ഓഫീസിലെത്തണ്ട ഗതികേടിലാണ്. പൊന്നാനി താലൂക്കില്‍ അഴീക്കല്‍, മരക്കടവ്, മുക്കാടി, തെക്കേകടവ് ,പുതുപൊന്നാനി, വെളിയങ്കോട്, പാലപ്പെട്ടി എന്നീ മത്സ്യ ഗ്രാമങ്ങളിലായി ഏകദേശം പതിനയ്യായിരത്തോളം ക്ഷേമനിധി അംഗങ്ങളാണുള്ളത്. ക്ഷേമനിധി അടക്കാനുള്ള ദിവസം വര്‍ധിപ്പിക്കണമെന്ന ആവശ്യം ശക്തമായിരിക്കുകയാണ്.
പൊന്നാനി ഓഫീസ് വിഭജിച്ച് വെളിയങ്കോട് മേഖല കേന്ദ്രീകരിച്ച് മറ്റൊരു ഓഫീസ് നിര്‍മിക്കണമെന്ന ആവശ്യവും ഉയരുന്നുണ്ട്. പൊന്നാനി ഓഫിസില്‍ സ്ഥിരം ഓഫീസറെ നിയമിക്കണമെന്നും മത്സ്യത്തൊഴിലാളികള്‍ ആവശ്യപ്പെട്ടു.