പൊന്നാനി: പൊന്നാനി പുഴമ്പ്രത്ത് നിയന്ത്രണംവിട്ട കാര്‍ ട്രാന്‍സ്‌ഫോമറില്‍ ഇടിച്ചു. അപകടത്തില്‍ ഡ്രൈവര്‍ അത്ഭുതകരമായി രക്ഷപ്പെട്ടു. ബുധനാഴ്ച രാത്രി പതിനൊന്നരയോടെയാണ് അപകടം നടന്നത്. എറണാകുളത്ത് നിന്നും കോഴിക്കോട്ടേക്ക് പോവുകയായിരുന്ന പൊന്നാനി നൈതല്ലൂര്‍ സ്വദേശി ഇസ്ഹാബ് സഞ്ചരിച്ചിരുന്ന ഫോര്‍ഡ് എക്കോസ്‌പോര്‍ട്ട് കാറാണ് നിയന്ത്രണം വിട്ട് ട്രാന്‍സ്‌ഫോമറില്‍ ഇടിച്ചത്.
നൈതല്ലൂരിലെ തറവാട്ടിലേക്ക് പോകുന്നതിനിടെ പുഴമ്പ്രം അണ്ടിത്തോട് സ്റ്റോപ്പില്‍ വെച്ച് എതിരേ വന്ന ലോറിക്ക് സൈഡ് കൊടുക്കുന്നതിനിടെ റോഡരികിലെ കാനയിലേക്ക് കാര്‍ ഇറങ്ങിയതോടെ നിയന്ത്രണം നഷ്ടമാവുകയും തൊട്ടടുത്ത ട്രാന്‍സ്‌ഫോമറില്‍ ഇടിച്ച് നില്‍ക്കുകയായിരുന്നു.ഇടിയുടെ ആഘാതത്തില്‍ ട്രാന്‍സ്‌ഫോമര്‍ കാറിന് മുകളിലേക്ക് പതിക്കുകയും കാറിന്റെ മുന്‍ഭാഗം മുകള്‍ഭാഗവും പൂര്‍ണമായും തകരുകയും ചെയ്തു. അപകടത്തില്‍ കാര്‍ ഡ്രൈവവറായ ഇസ്ഹാഖ് അത്ഭുതകരമായി രക്ഷപ്പെട്ടു. കാര്‍ ട്രാന്‍സ്‌ഫോമറില്‍ ഇടിച്ചതിനാല്‍ പ്രദേശത്ത് ഏറെ നേരം വൈദ്യുതി തടസപ്പെട്ടു.