തിരൂര്‍: പ്രകൃതിയോടും മനുഷ്യനോടും ആത്മാര്‍ഥമായ സമീപനം സ്വീകരിച്ചും നിലപാടുകളില്‍ വെള്ളം ചേര്‍ക്കാതെയും ഔദ്യോഗികജീവിതം തുടര്‍ന്ന തിരൂര്‍ ആര്‍.ഡി.ഒ ടി.വി സുഭാഷ് ഐ.എ.എസിലേക്ക് കാലെടുത്തുവയ്ക്കുന്നത് ആത്മാര്‍ഥതയും സത്യസന്ധതതയും കൈമുതലാക്കി.
ഭാരതപുഴ സംരക്ഷണമടക്കമുള്ള കാര്യങ്ങളില്‍ പരിമിതികള്‍ക്കുള്ളില്‍ നിന്നുകൊണ്ടു തന്നെ ശ്രദ്ധേയമായ ഇടപെടലുകള്‍ നടത്തിയിരുന്നു ഇദ്ദേഹം. തിരൂര്‍-പൊന്നാനി പുഴയേയും മാലിന്യത്തില്‍ നിന്നും വിമുക്തമാക്കാന്‍ പദ്ധതികള്‍ക്ക് തുടക്കമിട്ടു. പരിസ്ഥിതിസംബന്ധമായ വിഷയങ്ങളിലും ശക്തമായ ഇടപെടലായിരുന്നു ടി.വി സുഭാഷിന്റെ ഭാഗത്തു നിന്നുണ്ടായത്.
തിരൂരിലെ സംഘര്‍ഷനാളുകളില്‍ സമാധാനാന്തരീക്ഷം തിരികെയെത്തിക്കാന്‍ സാംസ്‌കാരിക പരിപാടികള്‍ക്ക് മുന്‍കൈയെടുത്തു. ഓഫിസ് അഴിമതി വിമുക്തമാക്കാനും ജനപക്ഷമാക്കാനും പ്രത്യേകം ശ്രദ്ധിച്ചു. തിരൂര്‍ റവന്യൂ മേഖലയെ ഓണ്‍ലൈന്‍വല്‍ക്കരിക്കാനും നേതൃത്വം നല്‍കി. തിരക്കുകള്‍ക്കിടയിലും സമയം കണ്ടെത്തി സാംസ്‌കാരിക പരിപാടികളിലും സജീവമായിരുന്നു. സംഗീതത്തില്‍ കടുത്ത അഭിനിവേശമുള്ള ടി.വി സുഭാഷ് മികച്ച ഗായകന്‍ കൂടിയാണ്. ഡെപ്യൂട്ടി കലക്ടറായി റവന്യൂ വകുപ്പില്‍ ഔദ്യോഗിക ജീവിതം ആരംഭിച്ച തിരൂര്‍ ആര്‍.ഡി.ഒ ടി.വി സുഭാഷിന് ഐ.എ.എസ്. 11 വര്‍ഷത്തെ സര്‍വിസിനിടെയാണ് ഐ.എ.എസ് പദവി ലഭിച്ചത്. 2007 ഏപ്രിലില്‍ പാലക്കാട് ഡെപ്യൂട്ടി കലക്ടറായാണ് സര്‍വിസില്‍ പ്രവേശിച്ചത്. തുടര്‍ന്ന് തലശ്ശേരി ആര്‍.ഡി.ഒ, കോട്ടയം എ.ഡി.എം, ഇടുക്കി, ആലപ്പുഴ ഡെപ്പൂട്ടി കലക്ടര്‍, മൂന്നാര്‍ മിഷന്‍ അംഗം, മെട്രോ റെയില്‍ സ്ഥലമെടുപ്പ് ടീം അംഗം എന്നി പദവികള്‍ വഹിച്ചു.