പാപ്പിനിശ്ശേരി: പാപ്പിനിശ്ശേരി ഉപജില്ലാ ശാസ്‌ത്രോല്‍സവം പ്രവൃത്തി പരിചയ മേളയില്‍ ഹയര്‍ സെക്കന്‍ഡറി വിഭാഗത്തില്‍ കല്യാശ്ശേരിയും ഹൈസ്‌ക്കൂള്‍ വിഭാഗത്തില്‍ പാപ്പിനിശ്ശേരി ഹയര്‍ സെക്കന്‍ഡറിയും ജേതാക്കളായി. യു.പി വിഭാഗത്തില്‍ രാമഗുരു യു.പിയും എല്‍.പി വിഭാഗത്തില്‍ പുഴാതി സെന്‍ട്രല്‍ യു.പിയും ഒന്നാം സ്ഥാനം നേടി. ഹയര്‍ സെക്കന്‍ഡറിയില്‍ വളപട്ടണവും ഹൈസ്‌ക്കൂള്‍ വിഭാഗത്തില്‍ കല്യാശ്ശേരിയും രണ്ടാം സ്ഥാനം നേടി. യു.പി വിഭാഗത്തില്‍ പുഴാതി സെന്‍ട്രലും എല്‍.പി വിഭാഗത്തില്‍ ജി.യു.പി പുഴാതിയും രണ്ടാം സ്ഥാനം നേടി. ഐ.ടി ഫെസ്റ്റില്‍ യു.പി, ഹൈസ്‌കൂള്‍, ഹയര്‍ സെക്കന്‍ഡറി വിഭാഗങ്ങളിലെല്ലാം അഴീക്കോട് ഹയര്‍ സെക്കന്‍ഡറി സ്‌കൂള്‍ ചാംപ്യന്മാരായി. സാമൂഹ്യ ശാസ്ത്രമേളയില്‍ എല്‍.പി വിഭാഗത്തില്‍ അക്ലിയത്ത് എല്‍.പിയും യു.പി വിഭാഗത്തില്‍ കണ്ണാടിപ്പറമ്പ് ദേശസേവാ യു.പിയും ഹൈസ്‌കൂള്‍ വിഭാഗത്തില്‍ കണ്ണാടിപ്പറമ്പും ഹയര്‍ സെക്കന്‍ഡറി വിഭാഗത്തില്‍ കല്യാശ്ശേരിയും ജേതാക്കളായി. ഗണിത ശാസ്ത്രമേളയില്‍ എല്‍.പി വിഭാഗത്തില്‍ ഒന്നാംസ്ഥാനം ഇരിണാവ് ഹിന്ദു എല്‍.പിയും പുഴാതി നോര്‍ത്ത് യു.പിയും പങ്കിട്ടു. യു.പി വിഭാഗത്തില്‍ പുഴാതി നോര്‍ത്ത് യു.പിയും ഹൈസ്‌കൂള്‍ ഹയര്‍ സെക്കന്‍ഡറി വിഭാഗങ്ങളില്‍ കല്യാശ്ശേരി ഗവ. ഹയര്‍ സെക്കന്‍ഡറിയും ജേതാക്കളായി. സമാപന സമ്മേളനം കെ.എം ഷാജി എം.എല്‍.എ ഉദ്ഘാടനം ചെയ്തു. ട്രോഫികള്‍ പാപ്പിനിശ്ശേരി ഉപജില്ലാ വിദ്യാഭ്യാസ ഓഫിസര്‍ ഹെലന്‍ മെന്‍ഡോണ്‍സ് വിതരണം ചെയ്തു. കണ്ണൂര്‍ കോര്‍പറേഷന്‍ സ്റ്റാന്‍ഡിങ് കമ്മിറ്റി ചെയര്‍മാന്‍ സി.കെ വിനോദ് അധ്യക്ഷനായി. കോര്‍പറേഷന്‍ കൗണ്‍സിലര്‍ ഷാഹിന മൊയ്തീന്‍, വി. ദാമോദരന്‍, എസ്. തങ്കമണി, ഒ. അനീഷ്, കെ. സുനില്‍കുമാര്‍, സി. ദിനേശന്‍, കെ. പ്രമോദന്‍ സംസാരിച്ചു.