കാഞ്ഞങ്ങാട്: എ.ഡി.എം എച്ച്. ദിനേശന് ഐ.എ.എസ് ലഭിച്ചതോടെ കാഞ്ഞങ്ങാടിന് ഇത് ഇരട്ട നേട്ടമായി. കാഞ്ഞങ്ങാട് ആര്‍.ഡി.ഒ ഡോ.പി.കെ ജയശ്രീക്കും ദിനേശനൊപ്പം ഐ.എ.എസ് ലഭിച്ചതാണു കാഞ്ഞങ്ങാടിന് അഭിമാനമായത്. ഇരുവരും കാഞ്ഞങ്ങാട്ടുകാരാണ്. കാഞ്ഞങ്ങാട്ടെ സാമൂഹ്യ സാംസ്‌കാരിക രംഗത്തു നിറഞ്ഞു നിന്ന എ.ഡി.എം എച്ച്. ദിനേശന്‍ 2000 ലാണ് റവന്യു വകുപ്പിലെ ജീവനക്കാരനായി ഒദ്യോഗിക രംഗത്തെത്തുന്നത്. ഓണാഘോഷത്തോടനുബന്ധിച്ച് മലബാറില്‍ തന്നെ പേരുകേട്ട നിത്യാനന്ദ യുവജന സമിതി പൂക്കള മത്സരത്തിന്റെ സംഘാടകരില്‍ പ്രധാനിയാണ് ദിനേശന്‍. 2006ല്‍ നേരിട്ട് ഡപ്യൂട്ടി കലക്ടര്‍ തസ്തികയിലെത്തിയ ദിനേശന്‍ കണ്ണൂരിലും പാലക്കാട്ടും എ.ഡി.എം ആയിരുന്നു. കാസര്‍കോട് മഹോത്സവം അടക്കമുള്ള ഒട്ടേറെ പരിപാടികളുടെ സംഘാടകനായി തിളങ്ങുകയും ചെയ്തു.