ചെറുവത്തൂര്‍: ഉപേക്ഷിക്കപ്പെട്ട സെപ്റ്റിക് ടാങ്കില്‍ വീണ പോത്തിനെ ഫയര്‍ഫോഴ്‌സ് ജീവനക്കാര്‍ പുറത്തെടുത്തു. ചന്തേര മാണിയാട്ട് ഇന്നലെ ഉച്ചയ്ക്കു രണ്ടോടെയാണു സംഭവം. വില്‍പനയ്ക്ക് എത്തിച്ച പോത്ത് മാണിയാട്ടെ കൃഷ്ണന്റെ പറമ്പിലെ പത്തടിയോളം താഴ്ചയുള്ള ടാങ്കിനുള്ളിലേക്കു വീഴുകയായിരുന്നു. വിവരമറിയിച്ചതിനെ തുടര്‍ന്നപ തൃക്കരിപ്പൂരില്‍ നിന്നു ഫയര്‍ഫോഴ്‌സ് ജീവനക്കാര്‍ സ്ഥലത്തെത്തി. കയര്‍ ഉപയോഗിച്ചു പോത്തിനെ പുറത്തെത്തിക്കാന്‍ ശ്രമിച്ചുവെങ്കിലും കഴിഞ്ഞില്ല. ജെ.സി ബി എത്തിച്ചു ടാങ്കിനോട് ചേര്‍ന്നു മണ്ണെടുത്തു വഴിയുണ്ടാക്കിയാണു പോത്തിനെ പുറത്തെത്തിച്ചത്. ഇതിനായി ഒരുമണിക്കൂറിലധികം പരിശ്രമിക്കേണ്ടി വന്നു.
സ്റ്റേഷന്‍ ഓഫിസര്‍ പി. സതീഷ്, ലീഡിങ് ഫയര്‍മാന്മരായ എം. ശ്രീധരന്‍, പി. ഭാസ്‌കരന്‍, ഫയര്‍മാന്മാരായ പി. രാഗേഷ്, ഷിജിത്ത് കുമാര്‍, വി.വി ലിഗേഷ് എന്നിവരുടെ നേതൃത്വത്തിലുള്ള സംഘം രക്ഷാപ്രവര്‍ത്തനങ്ങള്‍ക്കു നേതൃത്വം നല്‍കി.