അടിമാലി: അടിമാലി എസ്.എന്‍.ഡി.പി വി.എച്ച്.എസ് സ്‌കൂളിലെ പത്താം ക്ലാസ് വിദ്യാര്‍ഥികളെ ഹയര്‍ സെക്കന്‍ഡറി വിദ്യാര്‍ഥികള്‍ മദിച്ചതായി പരാതി. മര്‍ദനമേറ്റ രണ്ടു പേരെ അടിമാലി താലൂക്കാശുപത്രിയില്‍ പ്രവേശിപ്പിച്ചു.
സ്വകാര്യ ബസില്‍ സഞ്ചരിക്കുന്നതിനിടെയുണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്. പത്തിലേറെ പേര്‍ ചേര്‍ന്നാണ് തങ്ങളെ മര്‍ദിച്ചതെന്ന് ചികില്‍സയില്‍ കഴിയുന്നവര്‍ പറഞ്ഞു. വയറിനും നെഞ്ചിനുമാണ് പരിക്കേറ്റത്.
ഇതിനിടെ വിദ്യാര്‍ഥികള്‍ക്ക് മര്‍ദനമേറ്റാല്‍ ചൈല്‍ഡ് ലൈനും പൊലിസിനും വിവരം നല്‍കേണ്ട സ്‌കൂള്‍ അധികൃതര്‍ സംഭവം ഒതുക്കി തീര്‍ക്കാന്‍ ശ്രമിച്ചെന്ന് ആക്ഷേപമുണ്ട്. സംഭവമറിഞ്ഞ് ആശുപത്രിയിലെത്തിയ മാധ്യമ പ്രവര്‍ത്തകരെ കുട്ടികളുടെ ചിത്രമെടുക്കുന്നതില്‍ നിന്നു തടയുകയും ഭീഷണിപ്പെടുത്തി മടക്കി അയക്കാന്‍ ശ്രമിച്ചതായും പറയുന്നു. എന്നാല്‍ സംഭവം സംബന്ധിച്ച് അന്വേഷിച്ച് കുറ്റക്കാര്‍ക്കെതിരേ നടപടി സ്വീകരിക്കുമെന്ന് പ്രിന്‍സിപ്പല്‍ അറിയിച്ചു.