പാലാ: സംസ്ഥാന കായികമേളയ്ക്കായി സ്‌പോര്‍ട്‌സ് കൗണ്‍സില്‍ എത്തിച്ച ഉപകരണങ്ങള്‍ പാലായിലെ സിന്തറ്റിക് ട്രാക്ക് സ്റ്റേഡിയത്തില്‍ താത്ക്കാലികമായി സൂക്ഷിക്കും.
നവംബറില്‍ നടക്കുന്ന എം.ജി.യൂനിവേഴ്‌സിറ്റി മീറ്റില്‍ ഉള്‍പ്പടെ ഉപയോഗിക്കുവാനുള്ള സൗകര്യം കണക്കിലെടുത്താണ് പാലായില്‍ സൂക്ഷിക്കുന്നത്. ജില്ലാ സ്‌പോര്‍ട്‌സ് കൗണ്‍സില്‍ ഓഫിസര്‍ എസ്. മനോജിനാണ് പാലായില്‍ സൂക്ഷിച്ചിരിക്കുന്ന കായിക ഉപകരണങ്ങളുടെ ചുമതല.
പാലായില്‍ ആധുനിക നിലവാരത്തില്‍ നവീകരിച്ച സിന്തറ്റിക് ട്രാക്ക് സ്റ്റേഡിയത്തിന് ആവശ്യമായ കായിക ഉപകരണങ്ങള്‍ ലഭ്യമാക്കുമെന്ന് സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി.ദാസന്‍ അറിയിച്ചിരുന്നു. പാലായിലെത്തിച്ച ഉപകരണങ്ങള്‍ മുമ്പ് ദേശീയ മീറ്റിനായി കേരളാ സ്‌പോര്‍ട്‌സ് കൗണ്‍സിലിന് കേന്ദ്രസര്‍ക്കാര്‍ അനുവദിച്ചതാണ്.
എന്നാല്‍ ഇപ്പോള്‍ വന്നിരിക്കുന്ന ഉപകരണങ്ങള്‍ പാലാ സ്റ്റേഡിയത്തില്‍ സ്ഥിരമായി ലഭിക്കുവാന്‍ സാദ്ധ്യത കുറവാണന്ന് സ്‌പോര്‍ട്‌സ് കൗണ്‍സില്‍ അധികൃതര്‍ പറയുന്നു. അത്യാധുനിക സൗകര്യങ്ങളുള്ള ഈ ഉപകരണങ്ങള്‍ മത്സരങ്ങള്‍ക്ക് മാത്രം ആവശ്യമുള്ളതാണ്.പാലായില്‍ കൂടുതലും പരിശീലന ആവശ്യത്തിനുള്ള ഉപകരണങ്ങളാണ് വേണ്ടതെന്ന് കായിക രംഗത്തുള്ളവര്‍ പറയുന്നു.
പാലാ സ്‌റ്റേഡിയത്തില്‍ സ്ഥിരമായി ഉപകരണങ്ങള്‍ ലഭിച്ചാല്‍ ഈ മേഖലയിലുള്ളവര്‍ക്ക് നിലവാരമുള്ള ട്രാക്കില്‍ നിലവാരമുള്ള കായികോപകരണങ്ങള്‍കൊണ്ട് പരിശീലനം നടത്തുവാന്‍ സാധിക്കും. ഇത് കായിക രംഗത്തുള്ളവര്‍ക്ക് പ്രതീക്ഷയുണര്‍ത്തുന്നു.