കൊച്ചി: നിലമ്പൂര്‍ വനമേഖലയില്‍ മാവോയിസ്റ്റുകള്‍ വെടിയേറ്റു മരിച്ച സംഭവത്തില്‍ സി.ബി.ഐ അന്വേഷണം ആവശ്യപ്പെട്ടുള്ള ഹരജി ഹൈക്കോടതി തള്ളി. മാവോയിസ്റ്റുകളായ കുപ്പുസ്വാമിയും അജിതയും വെടിയേറ്റു മരിച്ച സംഭവത്തില്‍ പൊലിസിനെതിരേ കേസ് രജിസ്റ്റര്‍ ചെയ്തില്ലെന്ന പരാതി മജിസ്‌ട്രേറ്റ് കോടതിയില്‍ ഉന്നയിക്കാനും ഹൈക്കോടതി ഡിവിഷന്‍ ബെഞ്ച് നിര്‍ദേശിച്ചു. 2016 നവംബര്‍ 24നാണ് കരുളായ് വനമേഖലയിലെ ഉണക്കപ്പാറയില്‍ മാവോയിസ്റ്റ് വേട്ടയ്ക്കു നിയോഗിക്കപ്പെട്ട തണ്ടര്‍ ബോള്‍ട്ട് സംഘത്തിന്റെ വെടിയേറ്റ് അജിതയും കുപ്പുസ്വാമിയും കൊല്ലപ്പെട്ടത്. ഇതില്‍ സി.ബി.ഐ അന്വേഷണം വേണമെന്ന് ആവശ്യപ്പെട്ട് പി.യു.സി.എല്‍ സംസ്ഥാന ജനറല്‍ സെക്രട്ടറി അഡ്വ. പി.എ പൗരന്‍ നല്‍കിയ ഹരജിയാണ് ഡിവിഷന്‍ ബെഞ്ച് തള്ളിയത്.