പുതുക്കാട് : ഉഴിഞ്ഞാല്‍പാടത്തും റോഡിലും വ്യാപകമായി മാലിന്യം തള്ളുന്നു. മാംസാവശിഷ്ടങ്ങളും പ്ലാസ്റ്റിക് മാലിന്യവും ബാര്‍ബര്‍ ഷോപ്പിലെ മാലിന്യവുമാണ് ചാക്കുകളിലാക്കി തള്ളിയിരിക്കുന്നത്. പാടത്ത് തള്ളിയിരിക്കുന്ന മാലിന്യം സമീപത്തുള്ള തോട്ടിലൂടെ ഒഴുകി കുറുമാലി പുഴയിലാണ് എത്തുന്നത്. കാടുമൂടി കിടക്കുന്ന റോഡരികില്‍ മാലിന്യം തള്ളിയതോടെ യാത്രക്കാര്‍ക്കും ദുരിതമായിരിക്കുകയാണ്. ബാര്‍ബര്‍ ഷോപ്പില്‍ നിന്നുള്ള മുടിയും മറ്റ് മാലിന്യങ്ങളും റോഡിലാണ് നിക്ഷേപിച്ചിരിക്കുന്നത്. ഉഴിഞ്ഞാല്‍പാടം ഷട്ടര്‍ മുതല്‍ ഡിസ്റ്റലറി വരെയുള്ള റോഡിന്റെ ഇരുഭാഗത്തും മാലിന്യം കുമിഞ്ഞുകൂടുകയാണ്. അഴുകിയ മാംസാവശിഷ്ടങ്ങള്‍ റോഡില്‍ കെട്ടികിടക്കുന്നതുമൂലം ദുര്‍ഗന്ധവും തെരുവുനായ്ക്കളുടെ ശല്യവും പെരുകുകയാണ്. പ്രദേശത്ത് വീടുകളും വഴിവിളക്കും ഇല്ലാത്തതാണ് മാലിന്യം തള്ളുന്നവരുടെ കേന്ദ്രമായി ഉഴിഞ്ഞാല്‍പാടവും പരിസരവും മാറാന്‍ കാരണം. വഴിയരികിലെ കാട് വെട്ടിമാറ്റി മാലിന്യം നീക്കം ചെയ്യണമെന്നാണ് യാത്രക്കാരുടെ ആവശ്യം.