ലഖ്‌നൗ: സ്വിസ് വംശജരായ ദമ്പതികളെ ആക്രമിച്ചതുമായി ബന്ധപ്പെട്ട് അഞ്ചുപേരെ പൊലിസ് അറസ്റ്റ് ചെയ്തു. ആഗ്രയില്‍ ഫത്തേപൂര്‍ സിക്രിയില്‍ വച്ചാണ് സ്വിറ്റ്‌സര്‍ലാന്‍ഡ് സ്വദേശികളായ ക്വന്റന്‍ ജെറമി ക്ലര്‍ക്ക്(24), വനിതാ സുഹൃത്ത് മാരി ഡ്രോസ്(24 )എന്നിവര്‍ ആക്രമണത്തിന് ഇരയായത്.
ആക്രമണത്തിനു പിന്നില്‍ അഞ്ചംഗ സംഘമാണെന്ന് കഴിഞ്ഞ ദിവസം തന്നെ ഉത്തര്‍പ്രദേശ് ആഭ്യന്തര സെക്രട്ടറി ഭഗവന്‍ സ്വരൂപ് വ്യക്തമാക്കിയിരുന്നു. ഇതിനു പിന്നാലെയാണ് ഇവരെ പിടികൂടിയത്. അറസ്റ്റിലായവരില്‍ മൂന്നുപേര്‍ പ്രായപൂര്‍ത്തിയാകാത്തവരാണെന്ന് പൊലിസ് അറിയിച്ചു.
അതേസമയം തലക്ക് സാരമായി പരുക്കേറ്റിരുന്ന ക്വന്റന്‍ ജെറമിയെ ഇന്നലെ തീവ്രപരിചരണ വിഭാഗത്തില്‍ നിന്ന് വാര്‍ഡിലേക്ക് മാറ്റിയതായി ഡല്‍ഹി അപ്പോളോ ആശുപത്രിയിലെ ന്യൂറോ സര്‍ജന്‍ ഡോ. രാജേന്ദ്ര പ്രസാദ് അറിയിച്ചു. ജെറമിയുടെ വനിതാ സുഹൃത്ത് ഡ്രോസിന്റെ കൈക്ക് പൊട്ടലുണ്ട്. ഇതിനുള്ള ചികിത്സ നല്‍കിയ ശേഷം ഇവരെ വിട്ടയച്ചതായും അദ്ദേഹം വ്യക്തമാക്കി. എന്നാല്‍ മര്‍ദ്ദനത്തില്‍ ജെറമിയുടെ കേള്‍വിയ്ക്ക് തകരാറ് സംഭവിച്ചിട്ടുണ്ട്. ഇത് പരിഹരിക്കാന്‍ കഴിയുകയെന്നത് പ്രയാസമാണെന്ന് ഡോക്ടര്‍ പറഞ്ഞു.