കൊല്‍ക്കത്ത: ചരിത്രത്തിലേക്ക് സ്വന്തം നാമം എഴുതി ചേര്‍ത്താണ് ഇന്ത്യയില്‍ അണ്ടര്‍ 17 ലോകകപ്പ് മാമാങ്കത്തിന് കൊടിയിറങ്ങുന്നത്. കൗമാര ലോകകപ്പ് ചരിത്രത്തിലെ ഗോളുകളുടെ റെക്കോര്‍ഡ് ഇനി ഇന്ത്യക്ക് സ്വന്തം. ഇന്ന് 6000 കാണികള്‍ കൂടി സ്റ്റേഡിയത്തില്‍ കയറിയാല്‍ ഏറ്റവും കൂടുതല്‍ പേര്‍ മത്സരം കണ്ട ലോകകപ്പായി മാറും ഇന്ത്യയിലേത്. 1985 ലെ അണ്ടര്‍ 17 ലോകകപ്പിനാണ് ഇതുവരെ ഏറ്റവും കൂടുതല്‍ കാണികള്‍ കയറിയ റെക്കോര്‍ഡ്. അന്ന് 12,30,976 പേരാണ് കളികണ്ടത്. എന്നാല്‍, ലൂസേഴ്‌സ് ഫൈനലും ഫൈനലും ശേഷിക്കേ ഇതുവരെ ഈ ലോകകപ്പിന് സാക്ഷിയായത് 12,24,027 പേരാണ്. ചൈനയില്‍ നടന്ന ടൂര്‍ണമെന്റില്‍ മത്സരങ്ങള്‍ കുറവായത് കൊണ്ട് ശരാശരി കാണികള്‍ക്കുള്ള റെക്കോര്‍ഡ് ചൈനയ്ക്ക് തന്നെയാകും. ആറ് വേദികളിലായി നടന്ന മത്സരത്തില്‍ കൊല്‍ക്കത്തയ്ക്കാണ് ഏറ്റവും കൂടുതല്‍ കാണികളെ എത്തിച്ചതിനുള്ള റെക്കോര്‍ഡ്. ഒന്‍പത് മത്സരങ്ങള്‍ കാണാന്‍ 4,85,693 പേര്‍ സാള്‍ട്ട്‌ലേക്ക് സ്റ്റേഡിയത്തില്‍ എത്തി. ഏറ്റവും കൂടുതല്‍ ഗോളുകള്‍ പിറന്ന റെക്കോര്‍ഡും ഇന്ത്യക്ക് സ്വന്തം. 50 മത്സരങ്ങളില്‍ നിന്നായി 174 ഗോളുകളാണ് പിറന്നത്.