മുംബൈ: ഗുജറാത്ത് നിയമസഭാ തെരഞ്ഞെടുപ്പില്‍ ശിവസേന മത്സരിച്ചേക്കില്ലെന്ന് സൂചന. ബി.ജെ.പി വിരുദ്ധ വോട്ടുകള്‍ ഭിന്നിക്കാതിരിക്കാനാണ് നടപടിയെന്നാണ് റിപ്പോര്‍ട്ടുകള്‍.

അതേസമയം, കടുത്ത ബി.ജെ.പി വിരുദ്ധ നിലപാടുള്ള പട്ടേല്‍ സമരനേതാവ് ഹാര്‍ദ്ദിക് പട്ടേലിന് ശിവസേന നേരത്തെ പിന്തുണ പ്രഖ്യാപിച്ചിരുന്നു. എന്നാല്‍ ഇതു സംബന്ധിച്ച് ഔദ്യോഗിക ചര്‍ച്ചകള്‍ ഒന്നും നടന്നിട്ടില്ലെന്നാണ് ലഭിക്കുന്ന വിവരം.

കഴിഞ്ഞ രണ്ടു തെരഞ്ഞെടുപ്പുകളിലും ശിവസേന മത്സരിച്ചിരുന്നുവെങ്കിലും സീറ്റൊന്നും നേടാന്‍ സാധിച്ചിരുന്നില്ല.

ഗുജറാത്ത് തെരഞ്ഞെടുപ്പില്‍ ശിവസേനയുടെ നിലപാട് ഉദ്ധവ് താക്കറെ ഉടന്‍തന്നെ പ്രഖ്യാപിക്കുമെന്നാണ് പ്രതീക്ഷിക്കുന്നത്. ബി.ജെ.പിമായി മുന്നണിബന്ധത്തിലുണ്ടെങ്കിലും കഴിഞ്ഞ കുറച്ച് വര്‍ഷങ്ങളായി പാര്‍ട്ടിയെ രൂക്ഷമായി വിമര്‍ശിക്കാന്‍ ശിവസേന മടിക്കാറില്ല.

രാജ്യത്തെ നയിക്കാന്‍ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി പ്രാപ്തനാണെന്ന ശിവസേന എം.പി സഞ്ജയ് റൗട്ടിന്റെ പ്രസ്താവന ബി.ജെ.പിയെ രോഷംകൊള്ളിച്ചിരുന്നു. മഹാരാഷ്ട്രയില്‍ ബി.ജെ.പിയുമായി സഖ്യം ചേര്‍ന്നിരുന്നെങ്കിലും സുഖകരമായ ഒരു ബന്ധമല്ല ബി.ജെ.പിയുമായി ശിവസേന വെച്ചുപുലര്‍ത്തുന്നത്.