കൊച്ചി: സമസ്ത കേരള ജംഇയ്യത്തുല്‍ ഉലമ സീനിയര്‍ വൈസ് പ്രസിഡന്റായിരുന്ന ചെമ്പരിക്ക ഖാസി സി.എം അബ്ദുല്ല മൗലവിയുടെ മരണവുമായി ബന്ധപ്പെട്ട് സി.ബി.ഐ തയാറാക്കിയ അന്തിമറിപ്പോര്‍ട്ടിന്മേല്‍ വിധി പറയുന്നത് എറണാകുളം ചീഫ് ജുഡീഷ്യല്‍ മജിസ്‌ട്രേറ്റ് കോടതി അടുത്തമാസം ഒന്‍പതിലേക്ക് മാറ്റി.
സി.ബി.ഐ അന്വേഷണം അവസാനിപ്പിച്ച് നല്‍കിയ റിപ്പോര്‍ട്ട് സ്വീകരിക്കണമോ തള്ളിക്കളയണമോ എന്ന കാര്യത്തിലാണ് ഇന്നലെ കോടതി വിധി പറയാനിരുന്നത്. മരണവുമായി ബന്ധപ്പെട്ട് കഴിഞ്ഞ ദിവസങ്ങളില്‍ നടന്ന വെളിപ്പെടുത്തലുകളെ തുടര്‍ന്ന് കേസില്‍ കക്ഷിചേരാന്‍ അപേക്ഷ വന്നതിനെ തുടര്‍ന്നാണ് കേസ് മാറ്റിയത്.
സി.ബി.ഐ ഉദ്യോഗസ്ഥര്‍ ഇന്നലെ കോടതിയില്‍ ഹാജരായിരുന്നില്ല. കേസില്‍ കക്ഷിചേരാന്‍ അനുവദിക്കണമെന്ന ആവശ്യവുമായി ഹ്യൂമന്‍ റൈറ്റ്‌സ് ഓര്‍ഗനൈസേഷന്‍ ഓഫ് കേരള പ്രസിഡന്റ് ഉമര്‍ ഫാറൂഖ് തങ്ങളാണ് കോടതിയെ സമീപിച്ചത്.
ചെമ്പരിക്ക ഖാസിയുടെ മരണവുമായി ബന്ധപ്പെട്ട് ഓട്ടോ ഡ്രൈവറായ ആദൂര്‍ സ്വദേശി അഷ്‌റഫ് ചില നിര്‍ണായക വെളിപ്പെടുത്തലുകള്‍ തന്നോട് നടത്തിയിട്ടുണ്ടെന്ന് കാണിച്ചാണ് ഇദ്ദേഹം കേസില്‍ കക്ഷിചേരാന്‍ അപേക്ഷ സമര്‍പ്പിച്ചത്. വെളിപ്പെടുത്തല്‍ സംബന്ധിച്ച് തെളിവുകളും രേഖകളും തന്റെ കൈയിലുണ്ടെന്നും അദ്ദേഹം അവകാശപ്പെട്ടു.
തുടര്‍ന്ന് കോടതി കേസില്‍ കക്ഷിചേരാനുള്ള അപേക്ഷ ഫയലില്‍ സ്വീകരിച്ചു. കേസ് സംബന്ധിച്ച് അഷ്‌റഫ് ചില നിര്‍ണായക വെളിപ്പെടുത്തലുകള്‍ നടത്തിയിട്ടുണ്ടെന്നും എന്നാല്‍ ഇപ്പോള്‍ അഷറഫിനെ കാണാനില്ലെന്നും അപേക്ഷയിലുണ്ട്.
മൗലവിയുടെ അസ്വാഭാവിക മരണത്തില്‍ ആരെയും ബന്ധപ്പെടുത്താന്‍ സാധിക്കുന്ന തരത്തിലുള്ള തെളിവുകള്‍ ലഭിച്ചില്ലെന്ന് കാണിച്ച് ഇക്കഴിഞ്ഞ ജനുവരി 25നാണ് സി.ബി.ഐ അന്തിമ റിപ്പോര്‍ട്ട് കോടതിയില്‍ സമര്‍പ്പിച്ചത്.