കോഴിക്കോട്: മതേതരത്വം സംരക്ഷിക്കുന്നതില്‍ ദേശീയ തലത്തിലെ സജീവ സാന്നിധ്യമായിരുന്നു ഇ.അഹമ്മദെന്ന് ശശി തരൂര്‍ എം.പി. ഇന്ത്യന്‍ ദേശീയത വൈവിധ്യങ്ങളിലാണ് കുടികൊള്ളുന്നതെന്നും അത് ഒരു ആശയമാണെന്നും ഡല്‍ഹി കേന്ദ്രമായി പ്രവര്‍ത്തിക്കുന്ന എ.ഇസെഡ് ഫൗണ്ടേഷന്‍ കോഴിക്കോട്ട് സംഘടിപ്പിച്ച ഇ.അഹമ്മദ് അനുസ്മരണ പ്രഭാഷണത്തില്‍ അദ്ദേഹം പറഞ്ഞു.
ബി.ജെ.പിയുടേത് ഇരട്ടമുഖ രാഷ്ട്രീയമാണ്. ചരിത്രത്തെ വളച്ചൊടിച്ച് ദേശീയതയെ ഹൈജാക്ക് ചെയ്യാന്‍ ശ്രമിക്കുകയാണവര്‍. ഭൂരിപക്ഷ പ്രീണന നയമാണ് ബി.ജെ.പി ഇതിനു ഉപയോഗിക്കുന്നത്. എന്നാല്‍ ഇത് ലക്ഷ്യം കാണില്ല. ഇന്ത്യയുടെ ദേശീയതയെ കുറിച്ച് കൃത്യമായ അവബോധമില്ലാത്തതാണ് ഈ വിഫല തന്ത്രത്തിനു കാരണം.
ജാതി, മത,വര്‍ണ,വര്‍ഗ, ഭാഷാ അതിരുകള്‍ക്കപ്പുറമാണ് ഇന്ത്യക്കാരുടെ ദേശീയബോധം. നാനാത്വത്തില്‍ ഏകത്വമെന്നതാണ് ഇന്ത്യന്‍ ദേശീയതയുടെ ആധാരമെന്നും അദ്ദേഹം പറഞ്ഞു.
മോദി പട്ടേലിനെ അനുകരിക്കാന്‍ ശ്രമിക്കുകയാണെന്നും എന്നാല്‍ മോദിക്ക് പട്ടേലിനൊപ്പം നില്‍ക്കാനുള്ള യോഗ്യതയില്ലെന്നും തരൂര്‍ കൂട്ടിച്ചേര്‍ത്തു. ബി.ജെ.പി ഇന്ത്യ ഭരിച്ചിട്ട് നല്‍കാനായത് ഘര്‍വാപസിയും ലൗവ് ജിഹാദും ആന്റി റോമിയോ സ്‌ക്വാഡുമാണ്. ഭാരത് മാതാകീ ജയ് വിളിക്കാനുള്ള അവകാശം പോലെ തന്നെ വിളിക്കാതിരിക്കാനുള്ള അവകാശവുമുണ്ടെന്ന് തരൂര്‍ പറഞ്ഞു.
നെഹ്‌റുവിയന്‍ ആശയങ്ങളാണ് ഇന്ത്യയെ ഒരു കുടക്കീഴിലാക്കിയത്. ഭരണഘടന അതിനു കരുത്തേകി. ഗാന്ധിയെ വധിച്ചതിനെ തുടര്‍ന്ന് ആര്‍.എസ്.എസിനെ പട്ടേല്‍ നിരോധിച്ചിരുന്നു. എന്നാല്‍ അവര്‍ ഇപ്പോള്‍ ബി.ജെ.പിയുടെ രാഷ്ട്രീയ വിഭാഗമായി പ്രവര്‍ത്തിക്കുകയാണ്. ദേശീയ നയങ്ങള്‍ പോലും ആസൂത്രണം ചെയ്യുന്നത് അവരാണ്. ഇ.അഹമ്മദിന്റെ മകന്‍ റഈസ് അഹമ്മദ് സംസാരിച്ചു.
ചരിത്രകാരന്‍ എം.ജി.എസ് നാരായണന്‍ അധ്യക്ഷനായി. എ.ഇസെഡ് ഫൗണ്ടേഷന്‍ ചെയര്‍മാന്‍ പ്രൊഫ. ഇഖ്ബാല്‍ എസ് ഹസ്‌നൈന്‍, ജെ.ഡി.റ്റി ഇസ്്‌ലാം സി.പി കുഞ്ഞി മുഹമ്മദ് പങ്കെടുത്തു.