കാണ്‍പൂര്‍ ന്യൂസിലെന്‍ഡിനെതിരായ അവസാന ഏകദിനത്തില്‍ ആറു റണ്‍സിന് വിജയിച്ച് ഇന്ത്യ പരമ്പര സ്വന്തമാക്കി. കോഹ്‌ലി നായകമികവില്‍ തുടര്‍ച്ചയായ ഏഴാം പരമ്പരയാണ് ഇന്ത്യന്‍ ടീം സ്വന്തമാക്കിയത്.
അവസാന പോരാട്ടത്തില്‍ ആറ് റണ്‍സിന്റെ നാടകീയ വിജയം സ്വന്തമാക്കിയാണ് ഇന്ത്യ മൂന്ന് മത്സരങ്ങളടങ്ങിയ പരമ്പര 2-1ന് നേടിയത്.

ആദ്യം ബാറ്റ് ചെയ്ത ഇന്ത്യ നായകന്‍ വിരാട് കോഹ്‌ലി, രോഹിത് ശര്‍മ എന്നിവര്‍ നേടിയ സെഞ്ച്വറികളുടെ മികവില്‍ 50 ഓവറില്‍ ആറ് വിക്കറ്റ് നഷ്ടത്തില്‍ 337 റണ്‍സെടുത്തു. വിജയം തേടിയിറങ്ങിയ കിവികളുടെ പോരാട്ടം 50 ഓവറില്‍ ഏഴ് വിക്കറ്റ് നഷ്ടത്തില്‍ 331 റണ്‍സില്‍ അവസാനിച്ചു. അതേനാണയത്തില്‍ തിരിച്ചടിച്ച കിവികള്‍ ഒരുവേള വിജയം പ്രതീക്ഷിച്ചു. എന്നാല്‍ ഡെത്ത് ഓവറുകളില്‍ ഇന്ത്യന്‍ ബൗളിങ് നിര അവസരത്തിനൊത്തുയര്‍ന്നാണ് ടീമിന് വിജയമൊരുക്കിയത്.