റിയോ ഡി ജനീറോ: അത്‌ലറ്റിക്‌സില്‍ ഇന്ത്യയുടെ മോശം പ്രകടനം തുടരുന്നു. വനിതകളുടെ 100 മീറ്ററില്‍ രാജ്യം മുഴുവന്‍ ഉറ്റുനോക്കിയിരുന്നു ദ്യുതി ചന്ദ് പുറത്തായി.
അഞ്ചാം ഹീറ്റ്‌സില്‍ മത്സരിച്ച ദ്യുതിക്ക് 11.69 സെക്കന്‍ഡില്‍ ഏഴാം സ്ഥാനത്താണ് ഫിനിഷ് ചെയ്യാന്‍ സാധിച്ചത്. ഓവറോള്‍ റാങ്കിങ് കണക്കാക്കുമ്പോള്‍ 50ാം സ്ഥാനത്താണ് ദ്യുതി. ഇതോടെ താരം സെമിക്ക് യോഗ്യത നേടാതെ പുറത്താവുകയായിരുന്നു. ഒളിംപിക് മത്സരങ്ങളുടെ പരിചയക്കുറവാണ് ദ്യുതിക്ക് തിരിച്ചടിയായത്.
400 മീറ്ററില്‍ മലയാളി താരം മുഹമ്മദ് അനസും യോഗ്യതാ റൗണ്ടില്‍ പുറത്തായി. ഏഴാം ഹീറ്റ്‌സില്‍ 45.95 സെക്കന്‍ഡില്‍ ഫിനിഷ് ചെയ്ത അനസിന് ആറാം സ്ഥാനത്തെത്താനേ സാധിച്ചുള്ളൂ. ഓവറോള്‍ റാങ്കിങില്‍ 31ാം സ്ഥാനത്താണ് അനസ്.
പുരുഷന്‍മാരുടെ ലോങ് ജംപില്‍ അങ്കിത് ശര്‍മയാണ് പുറത്തായ മറ്റൊരു താരം. 7.67 മീറ്റര്‍ ചാടിയ താരത്തിന് യോഗ്യതാ റൗണ്ടില്‍ 12ാം സ്ഥാനത്താണ് ഫിനിഷ് ചെയ്യാന്‍ കഴിഞ്ഞത്. ഓവറോള്‍ റാങ്കിങില്‍ 24ാം സ്ഥാനത്താണ്.