കോഴിക്കോട്: വനിത ഹോസ്റ്റലിനു സമീപം രാത്രിയില്‍ എസ്.ഐയെ കണ്ടത് ചോദ്യം ചെയ്ത യുവാവിനെ മര്‍ദിച്ചതില്‍ പ്രതിഷേധിച്ച് പൊലിസ് സ്റ്റേഷനിലേക്ക് മാര്‍ച്ച് നടത്തി. കോഴിക്കോട് മെഡിക്കല്‍ കോളജ് എസ്.ഐ ഹബീബുള്ളക്കെതിരേ നടപടിയെടുക്കണമെന്നാവശ്യപ്പെട്ടാണ് വിദ്യാര്‍ഥികള്‍ പ്രതിഷേധ മാര്‍ച്ച് സംഘടിപ്പിച്ചത്.

കഴിഞ്ഞ വെള്ളിയാഴ്ച രാത്രി എരഞ്ഞിപ്പാലം ലേഡീസ് ഹോസ്റ്റലിനു സമീപം കറങ്ങുന്നത് ചോദ്യം ചെയ്തതിനാണ് 16കാരനെ എസ്.ഐ ക്രൂരമായി മര്‍ദിച്ചത്.

കഴുത്തിലെ എല്ലിനും ഇടുപ്പെല്ലിനും സാരമായി പരുക്കേറ്റ അജയ് (16) കോഴിക്കോട് ബീച്ച് ആശുപത്രിയില്‍ ചികിത്സയിലാണ്. മെഡിക്കല്‍ കോളജ് എസ്.ഐ ഹബീബുള്ളയാണ് തന്നെ മര്‍ദിച്ചതെന്നാണ് അജയ് പറഞ്ഞത്.

വനിതാ ഹോസ്റ്റലിനു മുന്നില്‍ എസ്.ഐ കറങ്ങുന്നത് കണ്ട അജയ്‌യുടെ പിതാവ് പുരുഷോത്തമന്‍ അദ്ദേഹത്തെ ചോദ്യം ചെയ്തു. ഇതോടെ എസ്.ഐ പുരുഷോത്തമനെ മര്‍ദിക്കുകയായിരുന്നു. ഇത് കണ്ട് തടയാനെത്തിയ അജയിനെയും തുടര്‍ന്ന് പൊലിസ് ക്രൂരമായി മര്‍ദിക്കുകയായിരുന്നു.

അതേസമയം, സംഭവം എസ്.ഐ നിഷേധിച്ചു. ഹോസ്റ്റലില്‍ താമസിക്കുന്ന പ്രതിശ്രുത വധുവിനെ കാണാന്‍ എത്തിയതാണെന്നും, കുട്ടി ചോദ്യം ചെയ്തപ്പോള്‍ എതിര്‍ക്കുക മാത്രമാണ് ചെയ്തതെന്നുമാണ് എസ്.ഐ വിശദീകരിച്ചത്.