ന്യൂഡല്‍ഹി: ഇവിടെ ജീവിക്കാന്‍ ഭയം തോന്നുന്നുവെന്ന് ആരുഷി വധക്കേസില്‍ കുറ്റവിമുക്തരാക്കപ്പെട്ട തല്‍വാര്‍ ദമ്പതികള്‍. ജയില്‍മോചിതരായ ശേഷം ഇതാദ്യമായാണ് ഇരുവരും നിലപാട് വ്യക്തമാക്കി രംഗത്തെത്തിയത്. ഹോട്ട് സ്റ്റാര്‍ ചാനലിന് നല്‍കിയ അഭിമുഖത്തിലാണ് ഇരുവരും ഇത്തരത്തില്‍ പ്രതികരിച്ചത്.
നാലുവര്‍ഷത്തെ ജയില്‍വാസത്തിനു ശേഷം പുറത്തിറങ്ങിയപ്പോള്‍ പൊതുസമൂഹം എങ്ങനെയാണ് തങ്ങളെ അഭിമുഖീകരിക്കുന്നതെന്ന കാര്യത്തില്‍ ഭയമുണ്ട്. ജയില്‍വാസം ജീവിതത്തിലെ ഇരുണ്ട കാലഘട്ടമായിരുന്നുവെന്ന് നൂപുര്‍ തല്‍വാര്‍ പറഞ്ഞു.
രാജേഷ് തല്‍വാറിന്റെയും നൂപുര്‍ തല്‍വാറിന്റേയും മകള്‍ ആരുഷിയും വീട്ടുവേലക്കാരനായ ഹേംരാജും കൊല്ലപ്പെട്ട കേസിലാണ് ഇരുവരെയും സി.ബി.ഐ കുറ്റക്കാരെന്ന് കണ്ടെത്തി ജയിലിലടച്ചത്. തടവുവാസം എളുപ്പത്തിലൊന്നും അഭിമുഖീകരിക്കാവുന്നതല്ല. തടവിലാക്കപ്പെടുന്നതോടെ സ്വാതന്ത്ര്യം നഷ്ടമാകും. പിന്നീട് പ്രതിസന്ധികളെയാണ് അഭിമുഖീകരിക്കേണ്ടതെന്നും രാജേഷ് തല്‍വാര്‍ പറഞ്ഞു.
തങ്ങള്‍ക്ക് ഏക മകളെ നഷ്ടപ്പെട്ടു. ഇത് ഇപ്പോഴും ദുരന്തമായിതന്നെയാണ് അവശേഷിക്കുന്നത്. കൊലപാതകത്തെക്കുറിച്ച് നടന്ന അന്വേഷണത്തില്‍ പിഴവുകളുണ്ടായോ എന്ന കാര്യത്തെക്കുറിച്ച് കൂടുതലൊന്നും സംസാരിക്കാന്‍ ഇരുവരും തയാറായില്ല. ചില കാര്യങ്ങള്‍ എല്ലാവര്‍ക്കും വ്യക്തമാകേണ്ടതായിട്ടുണ്ട്.
അന്വേഷണം വഴിതിരിച്ചുവിട്ടോയെന്നാണ് ചിലര്‍ ചോദിക്കുന്നത്. എല്ലാം രേഖകളായുണ്ട്. ഇക്കാര്യത്തില്‍ എന്തെങ്കിലും പറയാന്‍ ആഗ്രഹിക്കുന്നില്ലെന്നും രാജേഷ് തല്‍വാര്‍ പറഞ്ഞു.
ഒക്ടോബര്‍ 12നാണ് തല്‍വാര്‍ ദമ്പതികളെ കുറ്റക്കാരല്ലെന്ന് കണ്ട് അലഹബാദ് ഹൈക്കോടതി വെറുതെ വിട്ടത്. 2008ലാണ് നോയിഡയിലെ വീട്ടില്‍ ഇവരുടെ മകള്‍ ആരുഷിയെ കൊല്ലപ്പെട്ട നിലയില്‍ കണ്ടെത്തിയത്. രണ്ടുദിവസം കഴിഞ്ഞ് വേലക്കാരന്റെ മൃതദേഹവും വീട്ടിനു മുകളില്‍ നിന്ന് കണ്ടെത്തി. സംഭവത്തില്‍ കുറ്റക്കാരെന്ന് കണ്ടെത്തിയാണ് ഇരുവരെയും സി.ബി.ഐ കോടതി ശിക്ഷിച്ചിരുന്നത്.