കോഴിക്കോട്: മൂന്നു ഗ്രാം ബ്രൗണ്‍ഷുഗറുമായി മധ്യവയസ്‌കന്‍ പിടിയിലായി. കോഴിക്കോട് നഗരത്തില്‍ ബ്രൗണ്‍ഷുഗര്‍ വില്‍പന നടത്തുന്ന ചക്കുംകടവ് ചാമുണ്ടിവളപ്പ് സ്വദേശി ഇറാസിനെയാണ് (42) ഇന്നലെ വൈകിട്ട് കോഴിക്കോട് റെയില്‍വേ ലിങ്ക് റോഡില്‍നിന്ന് പൊലിസ് പിടികൂടിയത്.
തലശ്ശേരിയില്‍നിന്ന് ട്രെയിന്‍ മാര്‍ഗമാണ് ഇയാള്‍ ബ്രൗണ്‍ഷുഗര്‍ എത്തിക്കുന്നത്. സ്ഥിരമായി മയക്കുമരുന്ന് ഉപയോഗിക്കുന്ന ഇയാള്‍ അതിനാവശ്യമായ പണം കണ്ടെത്തുന്നതിനായാണ് ബ്രൗണ്‍ഷുഗര്‍ വില്‍പന നടത്തുന്നതെന്ന് പൊലിസ് പറഞ്ഞു.
കോഴിക്കോട് റെയില്‍വേ സ്റ്റേഷന്‍, കല്ലായി, ബീച്ച് പ്രദേശങ്ങള്‍ കേന്ദ്രീകരിച്ചാണ് ലഹരിവില്‍പന.
രണ്ടാഴ്ച മുന്‍പ് അഞ്ചു പാക്കറ്റ് കഞ്ചാവുമായി ഇയാളെ എക്‌സൈസ് സംഘം പിടികൂടിയിരുന്നു. ശേഷം ജാമ്യത്തിലിറങ്ങിയ ഇയാള്‍ ബ്രൗണ്‍ഷുഗര്‍ വില്‍പന നടത്തുന്നതായി വിവരം ലഭിച്ചതിനെ തുടര്‍ന്ന് കോഴിക്കോട് ആന്റി നാര്‍കോട്ടിക് സ്‌ക്വാഡും ടൗണ്‍ പൊലിസും ചേര്‍ന്നു നടത്തിയ നീക്കത്തിലാണ് ഇറാസിനെ അറസ്റ്റ് ചെയ്തത്.
ടൗണ്‍ എസ്.ഐ ശംഭുനാഥ്, എ.എസ്.ഐ ആലി, സി.പി.ഒ സജില്‍, ആന്റി നാര്‍കോട്ടിക് സ്‌ക്വാഡ് അംഗങ്ങളായ ജോമോന്‍, നവീന്‍, സുമേഷ്, ജിനേഷ്, രാജീവ് എന്നിവരുള്‍പ്പെട്ട സംഘമാണ് പ്രതിയെ പിടികൂടിയത്.