മാഡ്രിഡ്: സ്പാനിഷ് ലാ ലിഗയില്‍ നിലവിലെ ചാംപ്യന്‍മാരായ റയല്‍ മാഡ്രിഡിന് ഞെട്ടിപ്പിക്കുന്ന തോല്‍വി. ഒന്നിനെതിരേ രണ്ടു ഗോളുകള്‍ക്ക് ജിറോണയോടാണ് റയലിന് അടിതെറ്റിയത്. ഒരു ഗോളിന് മുന്നിട്ട് നിന്ന ശേഷമാണ് റയല്‍ അപ്രതീക്ഷിത തോല്‍വി ഏറ്റുവാങ്ങിയത്. സ്റ്റുവാനി, പോര്‍ട്ടു എന്നിവര്‍ ജിറോണയുടെ വിജയ ഗോള്‍ നേടി. സീസണില്‍ റയലിന്റെ രണ്ടാം തോല്‍വിയാണിത്. 

മത്സരത്തില്‍ ഉറച്ച വിജയം പ്രതീക്ഷിച്ചാണ് റയല്‍ കളത്തിലിറങ്ങിയത്. വേഗതയാര്‍ന്ന നീക്കങ്ങള്‍ കൊണ്ട് അവര്‍ എതിരാളികളെ ഞെട്ടിക്കുകയും ചെയ്തു. കാറ്റലോണിയന്‍ പ്രശ്‌നങ്ങള്‍ തങ്ങളെ ബാധിച്ചില്ലെന്ന് തെളിയിക്കുന്നതായിരുന്നു റയലിന്റെ ആദ്യ പകുതിയിലെ നീക്കങ്ങള്‍. കിക്കോ കാസില്ല, അഷ്‌റഫ് ഹക്കീമി എന്നിവര്‍ ടീമിന്റെ ആദ്യ ഇലവനില്‍ ഇടംപിടിച്ചിരുന്നു. റയലിന്റെ മുന്നേറ്റങ്ങളെ ഞെട്ടിക്കാന്‍ ആദ്യ പകുതിയില്‍ റയലിന് സാധിച്ചിരുന്നു. പാബ്ല മഫിയോയുടെ തകര്‍പ്പനൊരു നീക്കം ഫിനിഷ് പോരായ്മ കൊണ്ടാണ് ഗോളാവാതിരുന്നത്.
അപ്രതീക്ഷിതമായിട്ടാണ് റയല്‍ മുന്നിലെത്തിയത്. 12ാം മിനുട്ടില്‍ ടീം നടത്തിയ കൗണ്ടര്‍ അറ്റാക്കില്‍ ക്രിസ്റ്റ്യാനോ റൊണാള്‍ഡോ തൊടുത്ത ഷോട്ട് ജിറോണ ഗോള്‍കീപ്പര്‍ ബോണോ തട്ടിയകറ്റി. റീബൗണ്ടില്‍ ഇസ്‌കോ ലക്ഷ്യം കാണുകയായിരുന്നു. ഗോള്‍ നേടിയതോടെ റയല്‍ മികച്ച മുന്നേറ്റങ്ങള്‍ കൂടുതലായി നടത്തിയെങ്കിലും പ്രതിരോധത്തിലെ പോരായ്മ തിരിച്ചടിയാവുകയായിരുന്നു. പോര്‍ട്ടുവിന്റെയും സ്റ്റുവാനിയുടെയും നീക്കങ്ങള്‍ റയലിനെ സമ്മര്‍ദത്തിലാക്കിയെങ്കിലും ഗോള്‍ വഴങ്ങാതെ ആദ്യ പകുതിയില്‍ അവര്‍ പിടിച്ചു നിന്നു.
രണ്ടാം പകുതിയില്‍ ജിറോണ മത്സരത്തിന്റെ നിയന്ത്രണം ഏറ്റെടുത്തു. 54ാം മിനുട്ടില്‍ പെരെ പോണ്‍സ് മികച്ച ഡ്രിബിളിങിലൂടെ പന്ത് സ്റ്റുവാനിക്ക് കൈമാറി. മികവുറ്റ ഷോട്ടിലൂടെ താരം ടീമിന് സമനില ഗോള്‍ നേടിക്കൊടുത്തു. പ്രതിരോധത്തില്‍ റാഫേല്‍ വരാനെയ്ക്ക് പരുക്കേറ്റത് ടീമിന് തിരിച്ചടിയാവുകയായിരുന്നു. നാലു മിനുട്ടുകള്‍ക്ക് ശേഷം പോര്‍ട്ടു രണ്ടാം ഗോള്‍ നേടിയതോടെ റയലിന് പിന്നോട്ട് പോവുകയായിരുന്നു.
അവസാന നിമിഷം പ്രതിരോധം മോശമായതോടെ ഗോളുകള്‍ നേടാന്‍ ജിറോണയ്ക്ക് വീണ്ടും അവസരമുണ്ടായിരുന്നു. എന്നാല്‍ നിര്‍ഭാഗ്യം കൊണ്ടാണ് സാധിക്കാതെ പോയത്.
അതേസമയം തോല്‍വിയോടെ റയല്‍ പോയിന്റ് പട്ടികയില്‍ മൂന്നാം സ്ഥാനത്താണ്. ഒന്നാം സ്ഥാനത്തുള്ള ബാഴ്‌സയേക്കാള്‍ എട്ടുപോയിന്റ് പിറകിലാണ് റയല്‍. വലന്‍സിയയാണ് രണ്ടാം സ്ഥാനത്ത്. മറ്റൊരു മത്സരത്തില്‍ ലെവാന്റെ ഐബറിനെ 2-2ന് സമനിലയില്‍ തളച്ചു.

നാപ്പോളിക്ക് ജയം
മിലാന്‍: ഇറ്റാലിയന്‍ സീരി എയില്‍ വമ്പന്‍മാരായ നാപ്പോളിക്ക് ജയം. ഒന്നിനെതിരേ മൂന്നു ഗോളുകള്‍ക്ക് സാസുലോയെ ആണ് പരാജയപ്പെടുത്തിയത്. അലന്‍, ജോസെ കലെജോന്‍, മെര്‍ട്ടെന്‍സ് എന്നിവര്‍ നാപ്പോളിക്കായി സ്‌കോര്‍ ചെയ്തു.
മറ്റു മത്സരങ്ങളില്‍ ഫിയോറന്റീന, ജെനോവ ടീമുകള്‍ തോല്‍വി വഴങ്ങിയപ്പോള്‍ സാംപ്‌ദോറിയ, ഉദിനീസ് ടീമുകള്‍ ജയം സ്വന്തമാക്കി.

ലെസ്റ്ററിന് വിജയം
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ലെയ്സ്റ്റര്‍ സിറ്റിക്ക് ജയം. എതിരില്ലാത്ത രണ്ടു ഗോളിന് എവര്‍ട്ടണെയാണ് പരാജയപ്പെടുത്തിയത്. ജാമി വാര്‍ഡി, ഗ്രേ എന്നിവര്‍ മുന്‍ചാംപ്യന്‍മാര്‍ക്കായി സ്‌കോര്‍ ചെയ്തു.

വെര്‍ഡറിന് തോല്‍വി
മ്യൂണിക്ക്: ജര്‍മന്‍ ബുണ്ടസ് ലീഗയില്‍ വെര്‍ഡര്‍ബ്രമന് തോല്‍വി. എതിരില്ലാത്ത മൂന്നു ഗോളിന് ഓഗ്ബര്‍ഗാണ് പരാജയപ്പെടുത്തിയത്. മറ്റൊരു മത്സരത്തില്‍ ഇതേ സ്‌കോറിന് സ്റ്റുറ്റ്ഗര്‍ട് ഫ്രെയ്ബര്‍ഗിനെ വീഴ്ത്തി.