വാഷിങ്ടണ്‍: അഫ്ഗാനിസ്ഥാന്‍, പാകിസ്താന്‍ എന്നിവിടങ്ങളിലെ ഐ.എസ് നേതാവ് ഡ്രോണ്‍ ആക്രമണത്തില്‍ കൊല്ലപ്പെട്ടതായി യു.എസ് സ്ഥിരീകരിച്ചു. ഹാഫിസ് സഈദ് ഖാന്‍ ആണ് അഫ്ഗാനിസ്ഥാനിലെ നര്‍ഗരഹാര്‍ പ്രവിശ്യയിലെ കോട്ട് ജില്ലയില്‍ നടന്ന വ്യോമാക്രമണത്തില്‍ കൊല്ലപ്പെട്ടത്. പാകിസ്താനിലെ അഫ്ഗാന്‍ സ്ഥാനപതി ഹസ്‌റത്ത് ഉമര്‍ സഖില്‍വാലാണ് ഈ വിവരം ആദ്യം അറിയിച്ചത്. ഐ.എസിന്റെ മുതിര്‍ന്ന കമാന്‍ഡര്‍മാരും മറ്റും സംഘാംഗങ്ങളും ആക്രമണത്തില്‍ കൊല്ലപ്പെട്ടു. കഴിഞ്ഞ ജൂലൈ 26 നാണ് ഹാഫിസ് സഈദ് ഖാനെ ആക്രമണത്തിലൂടെ കൊലപ്പെടുത്തിയതെന്ന് യു.എസ് പ്രതിരോധ വക്താവ് പറഞ്ഞു.
അഫ്ഗാനിലും പാകിസ്താനിലും ഐ.എസിനെ സ്ഥാപിച്ചത് ഇയാളാണ്. നേരത്തെ താലിബാന്‍ നേതാവായിരുന്നു. ഇതുവരെ അഫ്ഗാനിസ്ഥാനില്‍ 300 ലേറെ ഐ.എസ് തീവ്രവാദികളെ കൊലപ്പെടുത്തിയതായി യു.എസ് സൈന്യം അറിയിച്ചു.