തിരുവനന്തപുരം: തട്ടുകടയിലെ പാചകവാതക സിലിണ്ടര്‍ പൊട്ടിത്തെറിച്ചുണ്ടായ തീപിടുത്തത്തില്‍ രണ്ടു കടകള്‍ കത്തിനശിച്ചു.
ഇന്നലെ വൈകിട്ട് ആറരയോടെ തിരുവനന്തപുരം മെഡിക്കല്‍ കോളജിനു സമീപത്തായിരുന്നു സംഭവം. രാത്രിയിലേക്കുള്ള ഭക്ഷണം പാകം ചെയ്യുന്നതിനിടെ തട്ടുകടയിലെ പാചകവാതക സിലിണ്ടര്‍ പൊട്ടിത്തെറിക്കുകയായിരുന്നു.
സമീപത്തുണ്ടായിരുന്നവര്‍ തലനാരിഴക്കാണ് പരുക്കേല്‍ക്കാതെ രക്ഷപ്പെട്ടത്. തട്ടുകടയില്‍ നിന്നു തീ പടര്‍ന്ന് സമീപത്തുള്ള ഹോട്ടല്‍ രാധാകൃഷ്ണ പൂര്‍ണമായും മറ്റൊരു കട ഭാഗികമായും കത്തി നശിച്ചു.
ചെങ്കല്‍ ചൂള, ചാക്ക ഫയര്‍ഫോഴ്‌സ് സ്റ്റേഷനുകളില്‍ നിന്നുള്ള നാലു യൂനിറ്റും മെഡിക്കല്‍ കോളജ് പൊലിസും ചേര്‍ന്നാണ് തീ നിയന്ത്രണവിധേയമാക്കിയത്.