കോവളം: തെരുവുനായയുടെ ആക്രമണത്തില്‍ നിന്ന് സ്‌കൂള്‍ കുട്ടികളെ രക്ഷിക്കാന്‍ ശ്രമിച്ച കോണ്‍ഗ്രസ് പ്രാദേശിക നേതാവിന് നായയുടെ ആക്രമണത്തില്‍ പരുക്കേറ്റു. കോണ്‍ഗ്രസ് കാഞ്ഞിരം കുളം ബ്‌ളോക്ക് കമ്മിറ്റി സെക്രട്ടറി സിദ്ദീക്കിനെയാണ് തെരുവ് നായ കടിച്ച് പരുക്കേല്‍പിച്ചത്.
ബാലരാമപുരത്തെ പാര്‍ട്ടി പരിപാടി കഴിഞ്ഞ് കോണ്‍ഗ്രസ് വിഴിഞ്ഞം മണ്ഡലം കമ്മിറ്റി പ്രസിഡന്റ് മുജീബിനൊപ്പം കാറില്‍ മടങ്ങവെ ഇന്നലെ വൈകിട്ട് 4 മണിയോടുകൂടി കിടാരക്കുഴിയില്‍ വെച്ചായിരുന്നു സംഭവം. കിടാരക്കുഴി ഗവ. എല്‍.പി.സ്‌കൂളിലെ വിദ്യാര്‍ഥികളെ റോഡരികില്‍ തെരുവ് നായ ആക്രമിക്കാന്‍ ശ്രമിക്കുന്നത് കണ്ട് കാര്‍ നിറുത്തി നായയെ വിരട്ടി ഓടിക്കാന്‍ ശ്രമിക്കവെയായിരുന്നു നായ സിദ്ദീക്കിനെ ആക്രമിച്ച് കടിച്ച് പരുക്കേല്‍പിച്ചത്.
കുട്ടികള്‍ ആക്രമണത്തില്‍ നിന്ന് രക്ഷപ്പെട്ടെങ്കിലും നായ സിദ്ദീക്കിന്റെ കൈപ്പത്തിയില്‍ കടിച്ച് തൂങ്ങി.
ഇതോടെ സംയമനം കൈവിടാതെ നായയെ തൂക്കി നിലത്തടിച്ചതോടെയാണ് നായ കടിവിട്ട് ഓടി രക്ഷപ്പട്ടത്. കൈക്ക് ആഴത്തില്‍ മുറിവേറ്റ സിദ്ദീക്കിനെ ഉടന്‍തന്നെ വിഴിഞ്ഞം ആശുപത്രിയിലും അവിടെ നിന്നും ജനറല്‍ ആശുപത്രിയിലുംചികിത്സ തേടി .തുടര്‍ന്ന് കൂടുതല്‍ പരിശോധനകള്‍ക്കായി മെഡിക്കല്‍ കോളേജിലേക്ക് മാറ്റി.