ജിദ്ദ: മദീന സന്ദര്‍ശനം പൂര്‍ത്തിയാക്കി ഇന്ത്യന്‍ ഹജ്ജ് കമ്മിറ്റി വഴിയെത്തിയ തീര്‍ഥാടകരുടെ ആദ്യസംഘം മക്കയിലെത്തി. ഇവര്‍ക്ക് ഇന്ത്യന്‍ ഹജ്ജ് മിഷനും വിവിധ സന്നദ്ധ സംഘടനകളും ചേര്‍ന്ന് വന്‍ വരവേല്‍പ്പ് നല്‍കി. രണ്ടായിരത്തിലെറെ തീര്‍ഥാടകര്‍ ആണ് കഴിഞ്ഞ ദിവസം മക്കയിലെത്തിയത്. ഡല്‍ഹി, വാരണസി, റാഞ്ചി, ഗയ, ഗുവാഹത്തി എന്നിവിടങ്ങളില്‍ നിന്നുള്ളവരാണ് മക്കയിലെത്തിയത്. ആറു ദിവസത്തിനിടെ ഇന്ത്യയില്‍ നിന്ന് 52 വിമാനങ്ങളിലാണ് 13,496 ഹാജിമാര്‍ മദീനയിലെത്തിയത്. ഇതില്‍ ഏറ്റവും കൂടുതല്‍ ഡല്‍ഹിയില്‍ നിന്നും കുറവ് റാഞ്ചിയില്‍ നിന്നുമാണ്.
ഹജ്ജ് കമ്മിറ്റി വഴി കേരളത്തില്‍ നിന്നുള്ളവര്‍ ഈ മാസം 22നാണ് എത്തുക. ഇവരുടെ മദീന സന്ദര്‍ശനം ഹജ്ജിനു ശേഷമായിരിക്കും. അതിനിടെ കേരളം ഉള്‍പ്പെടെയുള്ള സംസ്ഥാനങ്ങളിലെ സ്വകാര്യ ഗ്രൂപ്പുകള്‍ വഴിയുള്ളവര്‍ മക്കയില്‍ എത്തിക്കൊണ്ടിരിക്കുകയാണ്. ഇവിടെ എല്ലാ ഒരുക്കങ്ങളും പൂര്‍ത്തിയായതായി ഹജ്ജ് മിഷന്‍ അറിയിച്ചു.
കാണാതാവുന്ന ഹാജിമാരെ കണ്ടെത്തുന്നതിനും പരാതികള്‍ സ്വീകരിക്കുന്നതിനുമായി ജനറല്‍ വെല്‍ഫയര്‍ ഡെസ്‌ക് 24 മണിക്കൂറും പ്രവര്‍ത്തിക്കും. തീര്‍ഥാടകര്‍ക്കു പരാതി അറിയിക്കാന്‍ 8002477786 എന്ന നമ്പറില്‍ വിളിക്കാം. അതിനിടെ ലോകത്തിന്റെ വിവിധ ഭാഗങ്ങളില്‍ നിന്നുമെത്തിയ ഹാജിമാരുടെ എണ്ണം ലക്ഷം കവിഞ്ഞതായി സഊദി ഹജ്ജ് മിഷന്‍ അധികൃതര്‍ അറിയിച്ചു. 1,29, 442 ഹജ്ജ് തീര്‍ഥാടകരാണ് ഇതുവരെയായി എത്തിയത്. കഴിഞ്ഞ ദിവസം വരെയുള്ള കണക്കാണിത്.