ശ്രീകൃഷ്ണപുരം: നവകേരള മിഷന്റെ ഭാഗമായി കേരള സര്‍ക്കാര്‍ നടപ്പിലാക്കുന്ന ലൈഫ് പദ്ധതിയിലുള്‍പ്പെടുത്തി ഭൂരഹിത ഭവന രഹിതര്‍ക്കായി പാര്‍പ്പിട സമുച്ചയം നിര്‍മിക്കുന്നതിന് സൗജന്യമായി നാല്‍പ്പത്തിയഞ്ചു സെന്റ് സ്ഥലം നല്‍കി. കരിമ്പുഴ ഗ്രാമപഞ്ചായത്തിലെ പത്താം വാര്‍ഡില്‍ തോണിക്കുഴിഭാഗത്തുള്ള സ്ഥലമാണ് ബ്ലോക്ക് പഞ്ചായത്തിന് ലഭ്യമായത്. എളമ്പുലാശ്ശേരി എജ്യുക്ഷേഷന്‍ ട്രസ്റ്റിന്റെ നേതൃത്വത്തിലാണ് പദ്ധതിക്കാവശ്യമായ സ്ഥലം ഉറപ്പാക്കിയത്. ബ്ലോക്ക് പഞ്ചായത്തിന് പ്രസ്തുത സ്ഥലത്തിന്റെ ആധാരം ചെയ്തതിന്റെ രേഖകള്‍ കൈമാറി കൊണ്ടുള്ള ചടങ്ങ് നവംബര്‍ ഒന്നിന് വൈകിട്ട് നാലു മണിക്ക് എളമ്പുലാശ്ശേരി സെന്ററില്‍ നടക്കും. ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി ആധാരം ഏറ്റുവാങ്ങും. ബ്ലോക്ക് പ്രസിഡന്റ് പി. അരവിന്ദാക്ഷന്‍ അധ്യക്ഷനാകും.