പാവറട്ടി: ദിവസങ്ങളായുള്ള പിരിമുറുക്കത്തിന് അന്ത്യം കുറിച്ച് പാവറട്ടി ഗ്രാമപഞ്ചായത്ത് പ്രസിഡന്റായി മുസ്്‌ലിം ലീഗിലെ വടക്കയില്‍ അബു തെരഞ്ഞെടുക്കപ്പെട്ടു. യു.ഡി.എഫ് ധാരണ അനുസരിച്ച് കോണ്‍ഗ്രസ് അംഗം എന്‍.പി കാദര്‍മോന്‍ രാജി വെച്ച ഒഴിവിലാണു പുതിയ പ്രസിഡന്റിനെ തെരഞ്ഞെടുത്തത്. വടക്കയില്‍ അബുവിനു ഒമ്പത് വോട്ടും എതിര്‍ സ്ഥാനാര്‍ത്ഥി സി.പി.എമ്മിലെ വി.കെ ജോസഫിന് മൂന്നു വോട്ടും ലഭിച്ചു. സി.പി.എം അംഗം ശോഭ രഞ്ജിത്തിന്റെ വോട്ട് അസാധുവായി. ബി.ജെ.പി അംഗങ്ങള്‍ വോട്ടെടുപ്പില്‍ പങ്കെടുക്കാതെ ഇറങ്ങിപ്പോയി. യു.ഡി.എഫ് മെമ്പര്‍മാരില്‍ ഉണ്ടായിരുന്ന ഭിന്നിപ്പ് ജില്ലാതലത്തില്‍ നിന്നുണ്ടായ കൃത്യമായ ഇടപെടലില്‍ യോജിപ്പിലെത്തിയതാണ് യു.ഡി.എഫിന്റെ വിജയം ഉറപ്പായത്. യു.ഡി.എഫ് ധാരണ പ്രകാരം രണ്ടു വര്‍ഷത്തേക്കാണു മുസ്്‌ലിം ലീഗിന് പ്രസിഡന്റ് പദവി. എം.എസ്.എഫ് യൂണിറ്റ് പ്രസിഡന്റായി വിദ്യാര്‍ഥി രാഷ്ട്രീയത്തിലൂടെ പൊതു പ്രവര്‍ത്തന രംഗത്ത് സജീവമായ വടക്കയില്‍ അബു എം.എസ്.എഫ് ചാവക്കാട് താലൂക്ക് ജന. സെക്രട്ടറി , യൂത്ത് ലീഗ് മണലൂര്‍ നിയോജകമണ്ഡലം ജന.സെക്രട്ടറി, ട്രഷറര്‍, മുസ്്‌ലിം ലീഗ് തൃശൂര്‍ ജില്ലാ കൗണ്‍സിലര്‍ എന്നീ സ്ഥാനങ്ങള്‍ വഹിച്ചിരുന്നു. നിലവില്‍ മുസ്്‌ലിം ലീഗ് ജില്ലാ കൗണ്‍സിലറാണ്.