കയ്പമംഗലം: പെരിഞ്ഞനം കുറ്റിലക്കടവിലെ കുരുന്നുകള്‍ക്കും നാട്ടുകാര്‍ക്കും അക്ഷര വെളിച്ചമേകുകയാണ് ഭവനലൈബ്രറി. നടന്നുവരാന്‍ ശരിയായ വഴിപോലുമില്ലാത്ത ഇടുങ്ങിയ വീട്ടില്‍ വായനയുടെ ലോകം തുറന്നത് പണ്ടാരപറമ്പില്‍ ജയപാലന്റെ മകള്‍ രേഷ്മയാണ്.
പെരിഞ്ഞനം ആര്‍.എം.വി.എച്ച്.എസില്‍ നിന്ന് വി.എച്ച്.എസ്.ഇ യില്‍ പ്ലസ്റ്റു പാസായ ഈ മിടുക്കി പെരിഞ്ഞനം പഞ്ചായത്തില്‍ കുടുംബശ്രീയുടെ റിസോഴ്‌സ് പേഴ്‌സനാണിപ്പോള്‍.
മൂന്നുവര്‍ഷം മുന്‍പാണ് ഭവന വായനശാലയുടെ ആശയം മുളപൊട്ടുന്നത്. എന്‍.എസ്.എസിനു കീഴില്‍ മുന്‍ രാഷ്ട്രപതി എ.പി.ജെ അബ്ദുല്‍കലാമിന്റെ സ്മരണക്കായി സംസ്ഥാനമൊട്ടാകെ വീട്ടുലൈബ്രറികള്‍ തുടങ്ങാന്‍ നിര്‍ദേശമുണ്ടായിരുന്നു. പ്രോഗ്രാം കോര്‍ഡിനേറ്റര്‍ കാര്യമറിയിച്ചപ്പോള്‍ ആദ്യം കൈപൊക്കിയത് രേഷ്മയായിരുന്നു.
കുഞ്ഞുനാളിലെ പുസ്തകത്തെ പ്രണയിച്ച രേഷ്മക്ക് കളിപ്പാട്ടങ്ങളെക്കാള്‍ അച്ഛന്‍ വാങ്ങിക്കൊടുത്തത് പുസ്തകങ്ങളാണ്. ലൈബ്രറി തുടങ്ങാന്‍ തീരുമാനിച്ചതോടെ ചെറിയ വരുമാനക്കാരനായ അച്ഛന്‍, പണം കടം വാങ്ങി 30000 രൂപയുടെ പുസ്തകങ്ങള്‍ വാങ്ങി നല്‍കി. അധ്യാപകരും എന്‍.എസ്.എസ് യൂണിറ്റും കൂടി സഹകരിച്ചപ്പോള്‍ പുസ്തകങ്ങളുടെ എണ്ണം നാനൂറിലെത്തി. 2016ല്‍ ജില്ലയിലെ ഏറ്റവും നല്ല വീട്ടു ലൈബ്രറികളിലൊന്നായി രേഷ്മയുടെ ലൈബ്രറി തെരഞ്ഞെടുക്കപ്പെട്ടു.
'സുബോധം 1000 വിങ്ങ്‌സ് ഓഫ് ഫയര്‍ ' എന്ന് പേരിട്ട ലൈബ്രറി പദ്ധതിയുടെ ഭാഗമായി 2016 ജനുവരിയിലെ റിപ്പബ്ലിക് ദിന പരേഡിലേക്ക് രേഷ്മ തെരഞ്ഞെടുക്കപ്പെട്ടു. അങ്ങനെ രാഷ്ട്രപതി പ്രണബ് മുഖര്‍ജിയെ സന്ദര്‍ശിക്കാനും രാഷ്ട്രപതി ഭവനിലെ വിരുന്നില്‍ പങ്കെടുക്കാനും ഭാഗ്യമുണ്ടായി.
ഇന്ന് ആഴ്ചയില്‍ 50ഓളം കുട്ടികള്‍ സന്ദര്‍ശിക്കുന്ന, 850ലധികം പുസ്തകങ്ങളുള്ള ലൈബ്രറിയാണ് രേഷ്മയുടേത്. ഒന്ന് മുതല്‍ പ്ലസ്റ്റു വരെ ക്ലാസുകളിലുള്ള കുട്ടികളും അയല്‍വാസികളായ അമ്മമാരും പുസ്തകം തേടിയെത്തുന്നു.
നിര്‍ധന കുട്ടികള്‍ക്കായി ലേബര്‍ഇന്ത്യ മാസിക വരുത്തി, സൗജന്യ വായനക്ക് നല്‍കുന്നുണ്ട്. രേഷ്മക്ക് കിട്ടുന്ന അലവന്‍സും അച്ഛന്റെ വരുമാനത്തിലെ മുഖ്യപങ്കും പുസ്തകങ്ങള്‍ക്കായിത്തന്നെ ചെലവഴിക്കുന്നു. പഞ്ചായത്തിലെ 'ലൈഫ്' പ്രോഗ്രാമിന്റെ ഭാഗമായി 6000 രൂപ സമ്മാനം കിട്ടിയപ്പോള്‍ 4000 രൂപക്കും പുസ്തകം വാങ്ങിയെന്ന് രേഷ്മ പറയുന്നു.
വീട്ടിലേക്ക് വരാന്‍ കഴിയാത്തവര്‍ വിളിക്കുകയേ വേണ്ടൂ, പുസ്തകങ്ങളുമായി ലൈബ്രേറിയന്‍ സൈക്കിളില്‍ പറന്നെത്തും. പെരിഞ്ഞനം സി.എച്ച്.സിയില്‍ ഒഴിവുസമയങ്ങളില്‍ സൗജന്യ സേവനം ചെയ്യുന്ന രേഷ്മക്ക് എം.എല്‍.ടിയില്‍ ഡിപ്ലോമ എടുക്കണമെന്നാണ് ആഗ്രഹം.