മുംബൈ: ഇന്ത്യന്‍ വെറ്ററന്‍ പേസര്‍ ആശിഷ് നെഹ്‌റ നാളെ അന്താരാഷ്ട്ര ക്രിക്കറ്റില്‍നിന്നു വിരമിക്കും. നാളെ ആരംഭിക്കുന്ന ഇന്ത്യന്യൂസിലാന്‍ഡ് ട്വന്റിട്വന്റി മത്സരത്തോടെയാണ് നെഹ്‌റ തന്റെ ക്രിക്കറ്റ് കരിയറിന് തിരശീലയിടുന്നത്.

2018ല്‍ ട്വന്റി ട്വന്റി ലോകകപ്പ് നടക്കാനിരിക്കെയാണ് നെഹ്‌റയുടെ പ്രഖ്യാപനം. ലോകകപ്പിലേക്ക് ജൂനിയര്‍ കളിക്കാരെ തെരഞ്ഞെടുക്കണമെന്നായിരുന്നു നെഹ്‌റയുടെ തീരുമാനം. മുപ്പത്തിയെട്ടുകാരനായ താരം ഇന്ത്യയ്ക്കുവേണ്ടി 120 ഏകദിനങ്ങളില്‍ നിന്നായി 157 വിക്കറ്റുകള്‍ നേടിയിട്ടുണ്ട്. 26 ട്വന്റി ട്വന്റി മത്സരങ്ങളില്‍ നിന്നായി 34 വിക്കറ്റും, 17 ടെസ്റ്റില്‍ നി്ന്നുമായി 44 വിക്കറ്റും നെഹ്‌റ ഇന്ത്യയ്ക്ക് വേണ്ടി സ്വന്തമാക്കിയിട്ടുണ്ട്.

ഇന്ത്യ-ന്യൂസിലാന്‍ഡ് പരമ്പരയില്‍ മൂന്നു ട്വന്റിട്വന്റി മത്സരങ്ങളാണുള്ളത്. ഡല്‍ഹിയിലെ ഫിറോസ് ഷാ കോട്‌ലയിലാണ് ആദ്യ മത്സരം. അവസാന മത്സരം തിരുവനന്തപുരം ഗ്രീന്‍ഫില്‍ഡ് സ്റ്റേഡിയത്തിലാണ് നടക്കുന്നത്. വിജയത്തോടെ ആശിഷ് നെഹ്‌റയ്ക്ക് മികച്ച യാത്രയയപ്പ് നല്‍കാനാണ് ടീം ഇന്ത്യയുടെ തീരുമാനം.