നെടുമ്പാശ്ശേരി: ഹജ്ജ് കര്‍മം നിര്‍വഹിക്കുന്നതിനായി സ്വകാര്യ ഹജ്ജ് ഗ്രൂപ്പുകളുടെ നേതൃത്വത്തില്‍ നെടുമ്പാശ്ശേരി അന്താരാഷ്ട്ര വിമാനത്താവളം വഴി മക്കയിലേക്ക് യാത്രയാകുന്ന തീര്‍ഥാടകരുടെ തിരക്കേറി. കഴിഞ്ഞ നാല് ദിവസങ്ങളിലായി തൊള്ളായിരത്തോളം തീര്‍ഥാടകര്‍ നെടുമ്പാശ്ശേരി വഴി യാത്രയായിട്ടുണ്ട്. അടുത്ത ദിവസങ്ങളിലായി കൂടുതല്‍ പേര്‍ യാത്ര തിരിക്കും. സഊദി എയര്‍ലൈന്‍സിന്റെ ചാര്‍ട്ടേര്‍ഡ് വിമാനത്തിലും എയര്‍ ഇന്ത്യ, സഊദി എയര്‍ലൈന്‍സ്, ഒമാന്‍ എയര്‍ ,ജെറ്റ് എയര്‍വെയ്‌സ് തുടങ്ങിയവയുടെ വിമാനങ്ങളിലുമാണ് തീര്‍ഥാടകര്‍ യാത്രയായത്.
തീര്‍ഥാടകരോടൊപ്പം കുടുംബാംഗങ്ങളും, ബന്ധുക്കളും യാത്രയയക്കാന്‍ എത്തുന്നതോടെ വിമാനത്താവളത്തിലും തിരക്കേറുകയാണ്.സ്വാതന്ത്ര്യ ദിനാഘോഷത്തോടനുബന്ധിച്ച് യാത്രക്കാരുടെ സുരക്ഷാ പരിശോധനകള്‍ ശക്തമാക്കിയതോടെ യാത്രയില്‍ തടസം നേരിടാതിരിക്കാന്‍ വിമാനം പുറപ്പെടുന്നതിന് നാല് മണിക്കൂര്‍ മുന്‍പെങ്കിലും തീര്‍ഥാടകരോട് വിമാനത്താവളത്തില്‍ എത്തിച്ചേരാന്‍ വിവിധ ഹജ്ജ് ഗ്രൂപ്പുകള്‍ നിര്‍ദ്ദേശം നല്‍കിയിട്ടുണ്ട്. അന്താരാഷ്ട്ര ടെര്‍മിനലിനകത്ത് തീര്‍ഥാടകര്‍ക്ക് ഇഹ്‌റാമില്‍ പ്രവേശിക്കുന്നതിനും സിയാല്‍ സൗകര്യം ഒരുക്കിയിട്ടുണ്ട്. 5422 പേര്‍ക്കാണ് ഈ വര്‍ഷം സംസ്ഥാനത്ത് നിന്നും സ്വകാര്യ ഹജ്ജ് ഗ്രൂപ്പുകള്‍ വഴി ഹജ്ജിന് പോകാന്‍ അനുമതി ലഭിച്ചിരിക്കുന്നത്.ഇതില്‍ ബഹുഭൂരിഭാഗം പേരും നെടുമ്പാശ്ശേരി വഴിയാണ് യാത്രയാകുന്നത്. കരിപ്പൂരില്‍ വലിയ വിമാനങ്ങള്‍ക്ക് ഇറങ്ങാന്‍ അനുമതി ഇല്ലാത്തതിനാല്‍ വലിയ വിമാനങ്ങള്‍ ഉപയോഗപ്പെടുത്തിയുള്ള സര്‍വിസുകള്‍ പ്രമുഖ വിമാന കമ്പനികള്‍ നെടുമ്പാശ്ശേരിയിലേക്ക് മാറ്റിയിരുന്നു.