മുംബൈ: ബി.ജെ.പി ശിവസേനയുടെ പ്രഖ്യാപിത ശത്രുവാണെന്ന് പാര്‍ട്ടി എം.പി സഞ്ജയ് റാവത്ത്. ദേവേന്ദ്ര ഫഡ്‌നവിസ് സര്‍ക്കാരിന്റെ മൂന്നാം വാര്‍ഷികത്തിലാണ് സര്‍ക്കാരിലെ ഘടകകക്ഷികൂടിയായ ശിവസേന ബി.ജെ.പിയ്‌ക്കെതിരേ ശക്തമായ പ്രതിഷേധം ഉയര്‍ത്തിയത്. കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ പ്രകീര്‍ത്തിക്കാനും അദ്ദേഹം മറന്നില്ല.
കഴിഞ്ഞ മൂന്ന് വര്‍ഷത്തിനുള്ളില്‍ രാഹുല്‍ ഗാന്ധിയില്‍ ഒരുപാട് മാറ്റങ്ങളുണ്ടായിട്ടുണ്ട്. അദ്ദേഹത്തെ കേള്‍ക്കാന്‍ ജനങ്ങള്‍ കൂടുന്നുണ്ടെന്നും അദ്ദേഹം കൂട്ടിച്ചേര്‍ത്തു.
സഖ്യകക്ഷിയായി ഇപ്പോഴും നില്‍ക്കുന്നത് സര്‍ക്കാരിനെ സംരക്ഷിക്കാനാണ്. എന്നിരുന്നാലും ബി.ജെ.പിയോടുള്ള ശത്രുതയില്‍ നിന്ന് ശിവസേന പിന്നോക്കം പോയിട്ടില്ലെന്നും സഞ്ജയ് റാവത്ത് പറഞ്ഞു.
രാഹുല്‍ ഗാന്ധിയെ ജനങ്ങള്‍ അംഗീകരിക്കുന്നുണ്ട്. 2014ന് ശേഷം അദ്ദേഹത്തില്‍ ഒരുപാട് മാറ്റങ്ങളുണ്ടായിട്ടുണ്ട്. 2019ലെ ലോക്‌സഭാ, നിയമസഭാ തെരഞ്ഞെടുപ്പിനുള്ള തയാറെടുപ്പുകള്‍ ശിവസേനാ അധ്യക്ഷന്‍ ഉദ്ധവ് താക്കറെയുടെ നേതൃത്വത്തില്‍ തുടങ്ങിയിട്ടുണ്ട്. ഈ തെരഞ്ഞെടുപ്പുകളില്‍ ബി.ജെ.പിക്കൊപ്പം ചേര്‍ന്ന് മത്സരിക്കുമോ ഇല്ലയോ എന്ന് ഇപ്പോള്‍ പറയാനാകില്ലെന്നും അദ്ദേഹം വ്യക്തമാക്കി.