ഹൈദരാബാദ്: പരിശീലന പറക്കലിനിടയില്‍ വിമാനത്തിന്റെ വാതില്‍ വീടിന്റെ മുകളിലേക്ക് അടര്‍ന്നുവീണു. ഇന്നലെ തെലങ്കാനയിലെ സെക്കന്തരാബാദിനടുത്ത ലാലാഗുഡയിലെ ഗണേശ് യാദവ് എന്നയാളുടെ വീടിന്റെ ടെറസിലേക്കാണ് വിമാനത്തിന്റെ വാതില്‍ വീണത്. ഈ സമയം വീടിന്റെ ടെറസില്‍ പെയിന്റിങ് തൊഴിലാളിയുണ്ടായിരുന്നെങ്കിലും ഇയാള്‍ ഉച്ചഭക്ഷണം കഴിക്കാനായി താഴേക്കിറങ്ങുന്നതിനിടയിലായിരുന്നു വാതില്‍ വീണത്. അപകടത്തില്‍ നിന്ന് ഇയാള്‍ തലനാരിഴക്കാണ് രക്ഷപ്പെട്ടത്.
തെലങ്കാന ഏവിയേഷന്‍ അക്കാദമിയുടെ പരിശീലന വിമാനം 2500 അടി ഉയരത്തില്‍ പറക്കുന്നതിനിടയിലാണ് വാതില്‍ താഴേയ്ക്കുവീണത്. പൈലറ്റും ഒരു ട്രെയ്‌നിയുമായിരുന്നു വിമാനത്തിലുണ്ടായിരുന്നത്. ഈ ഭാഗത്ത് വിമാനങ്ങള്‍ പരിശീലന പറക്കല്‍ നടത്തുന്നത് പതിവാണ്. വിമാനവാതില്‍ താഴേയ്ക്ക് പതിച്ച സംഭവത്തില്‍ സിവില്‍ ഏവിയേഷന്‍ ഡയരക്ടര്‍ ജനറല്‍ അന്വേഷണം പ്രഖ്യാപിച്ചിട്ടുണ്ട്.