മക്ക: തീര്‍ഥ ജലമായ സംസമിന്റെ ഉത്ഭവ കിണര്‍ നവീകരണ പദ്ധതിയുമായി ബന്ധപ്പെട്ട് ഹറമില്‍ കര്‍ശന നിയന്ത്രണം ഏര്‍പ്പെടുത്തി. കഅ്ബക്ക് ചുറ്റുമുള്ള ത്വവാഫ് ചെയ്യുന്ന പ്രദേശമായ മത്വാഫിലേക്ക് കയറുന്നതിനെയാണ് അധികൃതര്‍ കര്‍ശന നിയന്ത്രണം ഏര്‍പ്പെടുത്തിയത്.
ക്രമീകരണത്തിന്റെ ഭാഗമായി ത്വവാഫ് നിര്‍വഹിക്കുന്നതിന് ഉംറ തീര്‍ഥാടകരെ മാത്രമേ അനുവദിക്കുകയുള്ളൂ. മറ്റു ത്വവാഫ് ചെയ്യുന്നവര്‍ക്കും തീര്‍ഥാടകര്‍ക്ക് വേണ്ടി മത്വാഫിന്റെ അടിയിലെ നിലയും ഒന്നാം നിലയും സജ്ജീകരിച്ചിട്ടുണ്ടെന്നു ഹറം സുരക്ഷാ സേന വക്താവ് മേജര്‍ സാമിഹ് അല്‍ സാല്‍മി പറഞ്ഞു. ഏഴു മാസത്തിനുള്ളില്‍ നവീകരണം പൂര്‍ത്തീകരിക്കാനാണ് പദ്ധതി.
രണ്ടു ഘട്ടമായുള്ള പദ്ധതികളില്‍ ഒന്ന് മത്വാഫിന്റെ കിഴക്ക് ഭാഗത്ത് അഞ്ചു തടയണകള്‍ നിര്‍മിക്കലാണ്.
സംസം കിണറിനു ചുറ്റും പരിസ്ഥിതി, അണു വിമുക്തമാക്കല്‍ എന്നിവയുടെ അവസാന ഘട്ട ജോലികളാണ് രണ്ടാം ഘട്ട പദ്ധതികളില്‍ ഉള്‍പ്പെടുക.