ധാക്ക: ബംഗ്ലാദേശില്‍ രണ്ട് വ്യത്യസ്ത ബോട്ടപകടങ്ങളിലായി ഏഴു റോഹിംഗ്യാ വംശജര്‍ മരിച്ചു. വംശീയ പീഡനം നടക്കുന്ന മ്യാന്മറില്‍നിന്നു പലായനം ചെയ്ത ഒട്ടേറെ പേര്‍ സഞ്ചരിച്ച ബോട്ടുകളാണു മറിഞ്ഞത്.
ഇന്നലെ രാവിലെ ബംഗ്ലാദേശിലെ കോക്‌സ് ബസാറിലാണ് ആദ്യ സംഭവം. ഒരു പുരുഷനും ഒരു സ്ത്രീയും രണ്ടു കുട്ടികളുമാണു മരിച്ചത്. ബോട്ടില്‍ സഞ്ചരിച്ച 37 പേരെ രക്ഷപ്പെടുത്തിയിട്ടുണ്ട്. ഇവരില്‍ 11 പേരെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചതായി ഉഖിയ പൊലിസ് ഓഫിസര്‍ മുഹമ്മദ് അബ്ദുല്‍ ഖൈര്‍ പറഞ്ഞു.
ഇന്നലെ തന്നെയുണ്ടായ മറ്റൊരു ബോട്ടപകടത്തില്‍ മൂന്ന് റോഹിംഗ്യാ അഭയാര്‍ഥികള്‍ മരിച്ചതായി തെക്‌നാഫ് പൊലിസും അറിയിച്ചു. ഈ ബോട്ടില്‍ നാല്‍പതോളം പേര്‍ യാത്ര ചെയ്തിരുന്നതായാണു വിവരം.