തിരുവനന്തപുരം: പോണ്ടിച്ചേരിയിലെ വ്യാജ മേല്‍വിലാസത്തില്‍ ആഡംബര വാഹനം രജിസ്റ്റര്‍ ചെയ്ത് ലക്ഷങ്ങളുടെ നികുതി വെട്ടിപ്പ് നടത്തിയ നടനും ബി.ജെ.പി രാജ്യസഭാ എം.പിയുമായ സുരേഷ് ഗോപിക്കെതിരേ നിയമ നടപടി ആവശ്യപ്പെട്ട് പരാതി. യൂത്ത് കോണ്‍ഗ്രസ് സംസ്ഥാന സെക്രട്ടറി എം.ധനീഷ്‌ലാല്‍ ആണ് ട്രാന്‍സ്‌പോര്‍ട്ട് കമ്മിഷണര്‍ അനില്‍ കാന്തിന് പരാതി നല്‍കിയത്.
പരാതി സ്വീകരിച്ച അനില്‍കാന്ത് തുടര്‍ നടപടി സ്വീകരിക്കുമെന്ന് അറിയിച്ചിട്ടുണ്ട്. എം.പി എന്ന നിലയില്‍ സുരേഷ് ഗോപി ഔദ്യോഗിക വാഹനമായി ഉപയോഗിക്കുന്ന ഓഡി ക്യൂ7 കാര്‍ പോണ്ടിച്ചേരിയില്‍ രജിസ്റ്റര്‍ ചെയ്തതാണ്.
പോണ്ടിച്ചേരിയിലെ സാധാരണക്കാര്‍ മാത്രം താമസിക്കുന്ന ഫ്‌ളാറ്റിന്റെ വിലാസം ഉപയോഗിച്ച് പി.വൈ 01 ബി.എ 999 എന്ന നമ്പറില്‍ ആഡംബര കാറിന് രജിസ്‌ട്രേഷന്‍ സംഘടിപ്പിച്ച് കേരളത്തിനു കിട്ടേണ്ട 15 ലക്ഷം രൂപയുടെ നികുതി വെട്ടിച്ചു എന്നാണ് പരാതി.