അഹമ്മദാബാദ്: ഗുജറാത്ത് തെരഞ്ഞെടുപ്പില്‍ കോണ്‍ഗ്രസിനെ പിന്തുണയ്ക്കുമെന്ന് പട്ടേല്‍ പ്രക്ഷോഭ നേതാവ് ഹാര്‍ദിക് പട്ടേല്‍. പട്ടേല്‍ സമുദായത്തിന്റെ ഉപാധികള്‍ കോണ്‍ഗ്രസ് അംഗീകരിച്ചെന്നും ഹാര്‍ദിക് പട്ടേല്‍ അറിയിച്ചു. എന്നല്‍ കോണ്‍ഗ്രസുമായി നടത്തിയ ചര്‍ച്ചയുടെ വിശദാംശങ്ങള്‍ ഹാര്‍ദിക് പുറത്തുവിട്ടിട്ടില്ല.

ദലിത് വിഷയത്തില്‍ രാഹുല്‍ ഗാന്ധിയുമായി ചര്‍ച്ചയ്ക്ക് തയാറാണെന്നു ദലിത് പ്രക്ഷോഭ നേതാവ് ജിഗ്നേഷ് മേവാനിയും അറിയിച്ചതോടെ സംസ്ഥാനത്ത് ബിജെപിക്ക് കാലിടറിയിരിക്കുകയാണ്.

പട്ടേല്‍ സംവരണ വിഷയത്തില്‍ കോണ്‍ഗ്രസ് നിലപാടു വ്യക്തമാക്കണമെന്ന് ഹാര്‍ദിക് പട്ടേല്‍ ആവശ്യപ്പെട്ടിരുന്നു. ഇതില്‍ അനുകൂല നിലപാട് കോണ്‍ഗ്രസ് സ്വീകരിച്ചതിനെ തുടര്‍ന്നാണ് ഇപ്പോള്‍ ഹാര്‍ദിക് പരസ്യമായി പിന്തുണ പ്രഖ്യാപിച്ചത്.

പട്ടീദാര്‍ കമ്മിഷന്‍, ഒ.ബി.സി ക്വാട്ടയില്‍ സമുദായാംഗങ്ങള്‍ക്ക് സംവരണം, സംവരണ പ്രക്ഷോഭത്തിനിടെ മരിച്ച യുവാക്കളുടെ കുടുംബങ്ങള്‍ക്ക് നഷ്ടപരിഹാരം തുടങ്ങിയ വിഷയങ്ങളിലും കോണ്‍ഗ്രസിന്റെ സമീപനം ഇവര്‍ക്ക് അനുകൂലമാകുമെന്നാണ് സൂചന.