തൃക്കരിപ്പൂര്‍: സി.പി.എം വടക്കെ തൃക്കരിപ്പൂര്‍ ലോക്കല്‍ സമ്മേളനവും പുതുതായി പാര്‍ട്ടിയിലേക്കു കടന്നുവന്നവര്‍ക്കുള്ള സ്വീകരണവും നാളെ വൈകീട്ട് നാലിനു തൃക്കരിപ്പൂര്‍ ബസ് സ്റ്റാന്‍ഡില്‍ നടക്കുമെന്നു സംഘാടകര്‍ വാര്‍ത്താസമ്മേളനത്തില്‍ അറിയിച്ചു. നിയോജക മണ്ഡലത്തിലെ വിവിധ പ്രദേശങ്ങളില്‍ നിന്നു യുവാക്കള്‍ സി.പി.എമ്മുമായി ഒരുമിച്ചു പ്രവര്‍ത്തിക്കാനുള്ള സന്നദ്ധത അറിയിച്ചിട്ടുണ്ട്. ഇതില്‍ ബീരിച്ചേരിയില്‍ നിന്നു പാര്‍ട്ടിയിലേക്കു കടന്നുവന്ന 45 പേര്‍ക്കു പാര്‍ട്ടി സമ്മേളനത്തില്‍ സ്വീകരണം നല്‍കും. വൈകിട്ട് തങ്കയം മുക്കില്‍ നിന്നു പ്രകടനം ആരംഭിക്കും. തുടര്‍ന്നു നടക്കുന്ന പൊതുസമ്മേളനം ഇ.പി ജയരാജന്‍ ഉദ്ഘാടനം ചെയ്യും.
പുതുതായി കടന്നുവന്ന പ്രവര്‍ത്തകരെ ജില്ലാ സെക്രട്ടറി കെ.പി സതീഷ് ചന്ദ്രന്‍ സ്വാഗതം ചെയ്യും. സയ്യിദ് റൂമി മുഖ്യ പ്രഭാഷണം നടത്തും. വാര്‍ത്താസമ്മേളനത്തില്‍ എം രാമചന്ദ്രന്‍, എം.പി കരുണാകരന്‍, പി.എ റഹ്മാന്‍ വി.പി യഅ്കൂബ്, സമീര്‍ കോച്ചന്‍ സംബന്ധിച്ചു.