മാവൂര്‍: മതപ്രബോധന മേഖലയില്‍ സേവനം ചെയ്തു കൊണ്ടിരിക്കുന്ന ഉമറാക്കള്‍ സമുദായത്തിന് ദിശാബോധം നല്‍കേണ്ടവരും പ്രബോധന മേഖലയില്‍ ഉത്തരവാദിത്തബോധത്തോടെ പ്രവര്‍ത്തിക്കേണ്ടവരുമാണെന്ന് പിണങ്ങോട് അബൂബക്കര്‍ പറഞ്ഞു.
പാഴൂര്‍ റെയ്ഞ്ച് ജംഇയ്യത്തുല്‍ മുഅല്ലിമീന്‍ ഗോള്‍ഡന്‍ ജൂബിലി ആഘോഷ പരിപാടികളുടെ ഭാഗമായി സംഘടിപ്പിച്ച സാരഥി സംഗമത്തില്‍ മുഖ്യ പ്രഭാഷണം നടത്തി സംസാരിക്കുകയായിരുന്നു. മുന്നൂര് അന്‍സാറുല്‍ ഇസ്‌ലാം മദ്‌റസയില്‍ ചേര്‍ന്ന സാരഥി സംഗമം കെ.കെ.എം ബാഖവി ഉദ്ഘാടനം ചെയ്തു. പാഴൂര്‍ റെയ്ഞ്ച് മദ്‌റസ മാനേജ്‌മെന്റ് അസോസിയേഷന്‍ പ്രസിഡന്റ് മൂശാരിക്കണ്ടി കോമു മോയിന്‍ ഹാജി അധ്യക്ഷനായി.അബ്ദുല്‍ ജബ്ബാര്‍ അന്‍വരി കെ.എ.ഖാദര്‍ മാസ്റ്റര്‍ ഇസ്മാലുട്ടി മാസ്റ്റര്‍ കെ. വീരാന്‍ കുട്ടി ഹാജി, ഇ.സി.എം ബഷീര്‍ മാസ്റ്റര്‍, എന്‍.എം ഹുസൈന്‍, എം.പി റസാഖ് സംസാരിച്ചു. സി.എ ശുക്കൂര്‍ മാസ്റ്റര്‍ സ്വാഗതവും ഇല്‍യാസ് ഫൈസി നന്ദിയും പറഞ്ഞു.