ന്യൂയോര്‍ക്ക്: അമേരിക്കയിലെ കൊളറാഡോയിലെ വാള്‍മാര്‍ട്ട് ഷോപ്പിങ് മാളില്‍ നടന്ന വെടിവയ്പില്‍ മൂന്നുപേര്‍ കൊല്ലപ്പെട്ടു. ബുധനാഴ്ച വൈകിട്ടായിരുന്നു സംഭവം. രണ്ടു പുരുഷന്‍മാരും ഒരു സ്ത്രീയുമാണ് കൊല്ലപ്പെട്ടത്. നിരവധിപേര്‍ക്ക് പരുക്കേറ്റിട്ടുമുണ്ട്.
കാറിലെത്തിയ ചിലര്‍ തലങ്ങും വിലങ്ങും വെടിവയ്ക്കുകയായിരുന്നു. പ്രതികളില്‍ ചിലരെ പൊലിസ് പിടികൂടിയതായി ദൃക്‌സാക്ഷികള്‍ പറയുന്നുണ്ടെങ്കിലും ഇതു വെടിവയ്പ് നടത്തിയവരാണോയെന്ന് വ്യക്തമല്ല.
ലാസ് വേഗസില്‍ മ്യൂസിക് ഫെസ്റ്റിവലിനിടെ നടന്ന വെടിവയ്പ് കഴിഞ്ഞ് ഒരുമാസം പിന്നിടുമ്പോഴാണ് പുതിയ സംഭവം.
അന്നു സ്റ്റീഫന്‍ പെഡോക്ക് എന്നയാള്‍ നടത്തിയ ആക്രമണത്തില്‍ 58 പേരാണ് കൊല്ലപ്പെട്ടിരുന്നത്. കഴിഞ്ഞ ദിവസം ന്യൂയോര്‍ക്കിലെ വേള്‍ഡ് ട്രേഡ് സെന്ററിനടുത്ത് ആള്‍ക്കൂട്ടത്തിലേക്കു ട്രക്ക് ഓടിച്ചുകയറ്റി നടത്തിയ ആക്രമണത്തില്‍ എട്ടുപേരും കൊല്ലപ്പെട്ടിരുന്നു.