ബുലവായോ: സിംബാബ്‌വെക്കെതിരായ ടെസ്റ്റ് പരമ്പര വെസ്റ്റിന്‍ഡീസ് സ്വന്തമാക്കി. രണ്ടാം ടെസ്റ്റ് സമനിലയില്‍ അവസാനിച്ചതോടെയാണ് രണ്ട് ടെസ്റ്റുകളടങ്ങിയ പരമ്പര വിന്‍ഡീസ് 1-0ത്തിന് നേടിയത്. സ്‌കോര്‍: വെസ്റ്റിന്‍ഡീസ് ഒന്നാം ഇന്നിങ്‌സില്‍ 448 റണ്‍സിന് പുറത്ത്. സിംബാബ്‌വെ ഒന്നാം ഇന്നിങ്‌സില്‍ 326. രണ്ടാം ഇന്നിങ്‌സില്‍ ഏഴ് വിക്കറ്റിന് 301.
സിംബാബ്‌വെക്കായി രണ്ടാം ഇന്നിങ്‌സില്‍ മധ്യനിര ബാറ്റ്‌സ്മാന്‍ സികന്ദര്‍ റാസ (89), ചകബ്‌വ (പുറത്താകാതെ 71) എന്നിവര്‍ തിളങ്ങി. വിന്‍ഡീസിനായി ഗബ്രിയേല്‍, കെമര്‍ റോച്, ദേവേന്ദ്ര ബിഷൂ എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.
നേരത്തെ വാലറ്റത്ത് ഡോവ്‌റിച്ച് (103), ഹോള്‍ഡര്‍ (110) എന്നിവര്‍ നേടിയ സെഞ്ച്വറികളുടെ ബലത്തിലാണ് വിന്‍ഡീസ് ആദ്യ ഇന്നിങ്‌സില്‍ മികച്ച സ്‌കോര്‍ സ്വന്തമാക്കിയത്. സികന്ദര്‍ റാസ കളിയിലെ കേമനും ദേവേന്ദ്ര ബിഷൂ പരമ്പരയുടെ താരവുമായി.