പുത്തന്‍ചിറ : സര്‍ക്കാര്‍ ആശുപത്രി കാര്യക്ഷമമായി പ്രവര്‍ത്തിക്കണം എന്ന് കരിങ്ങോള്‍ച്ചിറ ജനകീയ കൂട്ടായ്മ ആവശ്യപ്പെട്ടു. മുപ്പതോളം രോഗികളെ ഒരേസമയം കിടത്തി ചികിത്സിക്കാന്‍ സംവിധാനമുള്ള ആശുപത്രിയില്‍ മൂന്ന് രോഗികള്‍ മാത്രമാണുള്ളത്.
സ്വകാര്യ ആശുപത്രികളില്‍ പോലും രോഗികളുടെ അമിതമായ തിരക്ക് അനുഭവപ്പെടുന്ന സാഹചര്യത്തില്‍ പുത്തന്‍ചിറ സര്‍ക്കാര്‍ ആശുപത്രിയില്‍ കിടത്തി ചികിത്സയ്ക്ക് രോഗികള്‍ ഇല്ലാത്തതിന്റെ കാരണം അന്വേഷിച്ച് കണ്ടെത്തണം എന്ന് ജനകീയ കൂട്ടായ്മ ആവശ്യപ്പെട്ടു.
കൊടുങ്ങല്ലൂര്‍ ഇരിങ്ങാലക്കുട താലൂക്ക് സര്‍ക്കാര്‍ ആശുപത്രികളില്‍ രോഗികള്‍ക്ക് കിടക്കാന്‍ വരാന്തകളില്‍ വരെ ഇടം തേടേണ്ടിവരുന്ന സാഹചര്യത്തിലാണ് സ്ത്രീകള്‍ക്കും കുട്ടികള്‍ക്കും പുരുഷന്‍മാര്‍ക്കും പ്രത്യേക വാര്‍ഡ് സംവിധാനമുള്ള പുത്തന്‍ചിറ സര്‍ക്കാര്‍ ആശുപത്രി കിടപ്പു രോഗികള്‍ ഇല്ലാതെ ശൂന്യമായി കിടക്കുന്നത്.
ഡോക്ടര്‍മാരുടെ അനാസ്ഥ, വിദഗ്ധ ചികിത്സയുടെ അഭാവം, മറ്റ് ജീവനക്കാരുടെ അലംഭാവം, അങ്ങനെ കാരണം പലതും പറയാമെങ്കിലും നൂറുകണക്കിന് രോഗികള്‍ ഔട്ട്‌പേഷ്യന്റ് ആയി വരുന്ന ആശുപത്രിയില്‍ അടിയന്തര ചികിത്സ സൗകര്യങ്ങള്‍ ഇല്ലാത്തതിനാല്‍ രോഗികളെ അഡ്മിറ്റ് ചെയ്ത് റിസ്‌കെടുക്കാന്‍ ഡോക്ടര്‍മാര്‍ തയാറല്ല എന്നതാണ് വസ്തുത. കിടത്തി ചികിത്സ ആവശ്യമായി വരുന്ന ചെറിയ അസുഖമുള്ള രോഗികളെ പോലും താലൂക്ക് സര്‍ക്കാര്‍ ആശുപത്രി അടക്കമുള്ള മറ്റ് ആശുപത്രികളിലേക്ക് റഫര്‍ ചെയ്യുന്നത് കൊണ്ടാണ് പുത്തന്‍ചിറ സര്‍ക്കാര്‍ ആശുപത്രിയില്‍ കിടപ്പു രോഗികള്‍ ഇല്ലാത്തത്. ബ്ലോക്ക് പഞ്ചായത്ത് അധികൃതരും ആരോഗ്യവകുപ്പ് ഉദ്യോഗസ്ഥരും സംയുക്ത ചര്‍ച്ചകള്‍ നടത്തി ജനകീയ പങ്കാളിത്തത്തോടെ അടിയന്തിര അടിസ്ഥാന ചികിത്സാ സൗകര്യങ്ങള്‍ വര്‍ധിപ്പിച്ചു ജനങ്ങള്‍ക്ക് വിദഗ്ധ ചികിത്സ ലഭ്യമാക്കണമെന്നും ജനകീയ കൂട്ടായ്മ ആവശ്യപ്പെട്ടു.
വര്‍ഷങ്ങള്‍ക്ക് മുമ്പ് പ്രസവ വിഭാഗം വരെ പ്രവര്‍ത്തിച്ചിരുന്ന പുത്തന്‍ചിറ സര്‍ക്കാര്‍ ആശുപത്രി പൊതുജനങ്ങള്‍ക്ക് പൂര്‍ണമായും ഉപയോഗപ്പെടുത്താവുന്ന രീതിയില്‍ കൊണ്ടുവരാന്‍ ബ്ലോക്ക് പഞ്ചായത്ത് ഇനിയും മുന്‍കൈ എടുത്തില്ലെങ്കില്‍ ശോചനീയ അവസ്ഥയിലേക്ക് നീങ്ങുന്ന സര്‍ക്കാര്‍ ആശുപത്രികളുടെ പട്ടികയില്‍ പുത്തന്‍ചിറ സര്‍ക്കാര്‍ ആശുപത്രി മുന്‍നിരയില്‍ ഉണ്ടാകുമെന്ന് ജനകീയ കൂട്ടായ്മ ഓര്‍മപ്പെടുത്തി.
കൂട്ടായ്മ പ്രസിഡന്റ് സാലി സജീര്‍ അധ്യക്ഷനായ പ്രതിഷേധയോഗം പുത്തന്‍ചിറ വികസനകാര്യ സ്ഥിരം കമ്മിറ്റി ചെയര്‍മാന്‍ പി.എ നിസാര്‍ ഉദ്ഘാടനം ചെയ്തു. കൂട്ടായ്മ സെക്രട്ടറി യു.കെ വേലായുധന്‍ , കൂട്ടായ്മ ഭാരവാഹികളായ സനാതനന്‍ അഷ്‌റഫ് , കടൂപൂക്കര രവീന്ദ്രന്‍ , തെക്കേടത്ത് റിയാസ്, കരിങ്ങാച്ചിറ ശങ്കരന്‍ കുട്ടി, റാബിയ ടീച്ചര്‍, അഷ്‌റഫ് വൈപ്പിന്‍ കാട്ടില്‍ , ഹംസ പിണ്ടാണി സംസാരിച്ചു.